KvK cu algun conseho pa comerciante encuanto prevencion di criminalidad

Ta hopi notabel cu tin un aumento di criminalidad den dianan aki na Aruba. No tin mucho claridad riba e motibonan di e frecuencia, of e forma con esaki ta tumando lugar, pero si tin hopi presunto sospecho.

Ta nos deber pa laga esaki den man di e autoridad concerni pa haci nan trabou, pero di nos banda no por sinta man crusa y no contribui na minimaliza e situacion preocupante aki.

Ta importante si pa nos keda alerto y tuma e accion adecua pa purba preveni cu un crimen ta tuma lugar.

 

Na juni 2016 KvK a tene un lectura caminda a invita KPA (Korps Politie Aruba) pa informa esnan presente encuanto e impacto di criminalidad riba e comunidad.

KPA a trece informacion di criminalidad cu ta afecta nos tur den un forma of otro. Criminalidad ta afecta nos sociedad y e tin impacto severo riba nos economia y turismo en particular, según Presidente di KvK, Ernst Mohamed.

 

Dor cu e atraconan ta parce awor di ta algo di casi tur dia, e ta afecta nos sentido di seguridad. E ta crea miedo den nos comunidad y tambe desconfianza di haci loke nos sa haci normalmente.

Nos mester ta mas alerta y usa metodonan pa preveni criminalidad.

Como comerciante bo ta core un risico sea, pasobra e atracador ta asumi cu bo tin suma grandi di placa den bo poder of mercancia di balor cu e por bay cune.

Percura pa bo tin bon proceduranan di seguridad estableci pa bo negoshi. Proceduranan di placa mester bay cu e debido atencion di seguridad.

 

Ta recomendabel pa warda placa den un caha fuerte, pero preferiblemente deposita suma grandi mas pronto cu ta posibel na banco. Inversion den seguridad ta un gasto minimo compara cu e dañonan cu bo por haya bo cune pa via di un atraco.

Porta- y bentananan mester ta fuerte y cu un bon sistema di lock. Ta importante pa tanto na cas como na negoshi instala un sistema di seguridad. Ideal esaki ta inclui camara, luz y sensornan poni strategicamente pa por observa cualkier actividad rond di bo propiedad.

 

Particularmente camara pafor pa wak ki vehiculo a usa y den cual direccion a scapa. Depende bo presupuesto y con bon proteccion bo ta desea pa bo negoshi lo ta posibel pa inclui un security guard. Percura pa semper bo tin e numbernan di emergencia cla den ‘speed dial’ di bo telefon.

E ‘panic button’ di e alarma di auto tambe ta yuda spanta e atracador of hala atencion.

Ta consehabel pa yega na un acuerdo cu bo negoshinan bisiña p’asina yuda otro tira bista pa si ripara cualkier actividad straño.

Esaki den mesun forma cu un ‘neighbourhood watch’ caminda bisiñanan ta forma un comunidad cu ta tira bista riba bishitantenan den nan caya.

 

Percura tambe pa bo tin un bon seguro cu lo yuda cubri gastonan di ladronicia. Tene cuenta cu ora bo presencia of ta victima di un atraco, pa keda calmo y no haci nada cu bo por lamenta despues, especialmente si tin arma di candela envolvi.

Purba si di tuma contacto cu Polis lo mas pronto posibel via nan number di emergencia: 100.

Recientemente KvK tambe a atende e encuentro cu gremio di husticia caminda cu KPA a duna un presentacion di e cifranan di criminalidad di 2016 compara cu añanan anterior y kico nan maneho contra criminalidad lo ta pa 2017.

Nan a presenta iniciativanan p’asina por tin mihor control riba e actividadnan criminal y cu esakinan haya e atencion necesario.

 

Según su Presidente, Ernst Mohamed, KvK lo organisa un encuentro cu Minister di Husticia pa trece dilanti e preocupacion di empresarionan riba criminalidad.

Top