KvK ta reevalua e structura pa Debate Electoral 2017: Lo brinda e oportunidad pa tur partido politico participa na debate

Directiva di Camara di Comercio y Industria di Aruba (KvK) a reuni ayera pa reevalua e structura pa e debatenan. E motibo tras esaki ta cu KvK a constata cu tin cierto confusion y desacuerdo encuanto e rekisitonan stipula pa participacion na e debatenan.

 

KvK kier a mantene un balans structura cu un participacion di maximo 6 partido politico, di cual publico general lo por a vota via un encuesta online pa scoge 3 participante, pero en bista di e ultimo desaroyonan KvK lo brinda e oportunidad na tur e 8 partidonan en cuestion, esta ABO, AVP, MAS, MEP, POR, PPA, RED y UPP pa participa na e prome debate riba 8 di juni proximo.

 

Directiva di KvK ta kere cu di e forma aki por logra un debate democratico y asina por contribui na un miho paisahe politico ya cu ta e intencion pa ofrece un debate di calidad y pa debati riba topiconan interesante pa pueblo en general.  E decision aki a wordo tuma despues di reevaluacion y KvK ta spera cu esaki wordo respeta.

 

Lo tin ticket VIP disponibel pa e debatenan caminda cu lo brinda e oportunidad pa tene combersacion priva cu e participantenan di e debate.

 

Pa e segundo debate cu lo tuma luga riba 17 di augustus, KvK lo informa e structura na su debido tempo teniendo cuenta cu registracion oficial pa e Eleccion 2017.

Top