KWF ta organisa otro Ride, Walk & Run for the Roses

Diadomingo 23 di april proximo Koningin Wilhelmina Fonds Aruba ta organisando e tradicional Ride, Walk & Run for the Roses, cu e aña aki ta celebra su di 7 aniversario.

E actividad aki ta pa na un manera saludabel y hopi dushi por recauda fondo p’e fundacion KWF Aruba por sigui brinda su servicionan n’e comunidad di Aruba.

Nos kier yama danki di awor caba na Alhambra Casino, Wielerbond, RadioShack Aruba y Tribike Aruba cu pa añanan caba a bin ta yuda nos carga e evento aki.

 

META

E actividad aki ta pa recauda fondo pa fundacion KWF Aruba por sigui brinda su servicionan n’e comunidad di Aruba.

KWF-Aruba ta distribui diferente material di conscientisacion tocante diferente tipo di cancer, ta participa na y ta organisa diferente charla y ta brinda apoyo directamente n’e paciente di cancer, su famia y amistadnan.

E papel di KWF ta specialmente pa e.o. asisti cu e thuiszorg di cada paciente y ofrece nan e prothesenan necesario despues di un operacion di pecho.

Tambe KWF ta cubri gasto di biahe di e di dos begeleider ora un paciente mester bay afo.


DEDICACION SPECIAL

Atrabes di e evento di Ride, Walk & Run for the Roses tur hende lo por tambe haci un colecta bao famia, amigo of coleganan y haci un dedicacion special na un persona cu a fayece di e malesa di cancer of cu a cura for di e malesa aki.

E fondonan recauda tambe lo bay pa sigui yuda otro personanan cu e necesidad di ayudo y sosten di KWF.

ACTIVIDAD

Diadomingo 23 di april lo tin diferente ruta p’e actividad aki cu ta sali y caba na parkinglot di Alhambra Casino. 5K Walk and Run, ta sali for di Alhambra  – Phoenix Hotel – Alhambra; 6K Biking di Alhambra  – Phoenix Hotel – Alhambra; 20K Biking di Alhambra  – Lighthouse – Alhambra; 30K Biking di Alhambra  – Lighthouse – Alto Vista – Alhambra.

Na final tur participante lo ricibi un bunita rosa cu ta representa un bunita bida pa nos tur. Lo bay tin diferente actividad pa mucha, DJ, hopi ambiente despues di e careda asina tur hende por refresca nan mes y hopi premio nan cu lo keda rifa.

Tambe nos lo tin e team dinamico di Candito Tromp pa duna masage na tur e coredornan.

INSCRIPCION

Participacion Ride, Walk & Run for the Roses 2017, diadomingo 23 di april tin un contribucion chiquito cu ta inclui un t-shirt tanten cu tin den stock. Por inscribi via nos facebook page Koningin Wilhelmina fonds Aruba y tambe por cumpra ticket na Oficina di Koningin Wilhelmina Fonds na Spinozastraat 9, na Botica Aloe na Pos Chikito; na Radio Shack Aruba na Playa; TriBike Aruba na Sta. Cruz.

KWF Aruba ta invita comunidad henter pa inscribi, contribui y participa diadomingo 23 di april pa duna un man n’e organisacion cu tur dia ta duna sosten na comunidad y tambe ta contribui na salud di e pueblo.

Asina ta, prepara bo mes y anima mas amigonan p’asina hunto participa n’e Ride, Walk & Run for the Roses 2017.

 

 

Top