La Cabana a haci un donacion generoso na Huize Maris Stella

Recientemente un truck yena cu articulo di donacion a yega na Huize Maris Stella na Savaneta, mescos cu a tuma lugar riba Dia di Tata, ora La Cabana Beach Resort & Casino e trece cuminda, brasa y sonrisa p’e 160 habitante y miembronan di staff, n’e cas di anciano situa na Savaneta.

Na juni, mas o menos 10 empleado di e resort, hunto cu Director di Food and Beverage Pierre Kock, a yuda sirbi cuminda y desea e habitantenan un dushi fin di siman di Dia di Tata.

E tabata un oportunidad positivo pa papia y conecta cu e ancianonan, kendenan a yama bon bini n’e bishitantenan y enberdad a disfruta di e cuminda y e bishita.

 

“Nos ta sumamente conciente di nos responsabilidad social,” Pierre Kock a bisa n’e momento ey, “y ta dedica recursonan y energia na sirbi nos huespednan, nos asociadonan y nos comunidad. Sirbiendo lunch na Cas di Anciano,” el a agrega,” tabata un experiencia sumamente agradable, y nos tin planea di ripiti esaki, lagando e habitantenan anciano sa cu nan no a wordo lubida.”

 

Pierre Kock a keda fiel na su palabra. E regalonan di e siman aki, acepta na Huize Maris Stella pa Merita Tjou-Tam Sin, Gerente di e sitio, y su ekipo, a inclui 17 TV cu remote control y bracket, 30 cortina, 110 cusinchi y 40 klechi di cama, tur tabata articulo djis un tiki uza, pero den bon condicion, cual a haci e cas contento cu e colaboracion util y e cuido cu e habitantenan anciano a ricibi y merece!

E cas a duna un danki di curason n’e resort pa tur esnan cu a bin hunto pa haci e proyecto comunitario excelente aki un realidad.

 

 

 

Top