La Fama Damas ta inicia campeonato cu triunfo comodo riba Estudiantes

Diamars anochi Arubaanse Voetbal Bond a duna comienso n’e temporada di futbol Division Damas 2017-2018 caminda den Compleho Deportivo Frans Figaroa na Noord, e number tres y number cuater di temporada pasa, a topa otro.

Estudiantes cu a termina na di tres lugar ultimo temporada a enfrenta e ekipo di Savaneta La Fama y aki tin cu mustra cu e damanan di Savaneta a domina e encuentro den su totalidad pa finalmente bin gana facilmente cu anotacion di 5-2.

 

Ambos ekipo a subi tereno c’un otro cara, cu varios otro hungador caminda Estudiantes na final di temporada a mira varios hungador bay studia den exterior y otronan cu a cambia di ekipo mientras cu La Fama tambe a mira algun cambio den su alineacion.

Un di e hungadonan nobo di La Fama tabata e hobencita Shadira Croes, kende tin apenas 13 aña y ta producto di e division di LIFIDA di La Fama, pero kende a impresiona grandemente cu su tecnica y bon toke di bala.

 

Shadira a anota dos di e cinco golnan di La Fama, mientras cu e otro golnan a wordo anota pa Lillian Saladin, kende tambe a anota dos, mientras cu Yenhifer Huntington kende a anota un gol.

For di inicio di e partido La Fama a pasa pa domina e accionnan riba tereno principalmente den medio campo y e parti defensivo no a brinda Estudiantes pa haci mucho cos, mientras cu den e parti ofensivo e ekipo a presiona y crea varios situacion di peliger p’e gol di Estudiantes.

Ya na di 12 minuut di wega La Fama ta bay riba 1-0 ora cu Yenhifer Huntington bay laga riba e banda robes y na momento cu keeper di Estudiantes sali na su encuentro, e ta hunga e bala pa Lillian Saladin, kende ta pusha e bala den e gol bashi pa pone su ekipo ariba.

La Fama a sigui crea situacionnan di gol, pero cu no a wordo probecha den e prome periodo aki y asina e prome tempo a termina cu bentaha pa e ekipo di Savaneta cu anotacion di 1-0.

 

Den di dos tempo La Fama su dominio a bira mas grandi y cu dominio total den medio campo a sigui presiona e gol di Estudiuantes y no a tarda mucho pa Yenhifer Huntington, kende a hunga un tremendo wega, kita e defensa central di Estudiantes y bay su so riba keeper y logra di pusha e bala den net pa pone su ekipo ariba 2-0.

Un tremendo tiro liber cobra pa Shadira Croes net pafo di area penal, ta bin duna La Fama bentaha di 3-0 caminda e gran talento aki a demostra un precision den su tiro liber.

 

La Fama den e periodo aki tabatin domino amplio riba su rival y tabata Lillian Saladin, kende ta logra probecha di un rebote pa kop e bala den net pa e 4-0 y finalmente tabata Shadira Croes kende ta bolbe impresiona c’un tiro na rand di area cu  a laga keeper sin posibilidad algun pa duna La Fama bentaha comodo di 5-0.

La Fama a logra di crea mas oportunidad di gol, pero no a probecha y den e parti final Estudiantes ta logra di anota dos gol riba contra atake p’asina salba honor y pone e marcado final na 5-2.

 

Leave a Reply

Top