Ladronicia cu violencia cu detencion

WILLEMSTAD – Diadomingo 2 di april 2017, alrededor di 20:28, Central di Polis a dirigi un patruya na un cas na Groot Sta. Martha caminda un caso di ladronicia cu violencia a tuma luga.

 

For di un investigacion preliminar cu Polis a haci na e sitio, a sali na cla cu tres homber tur na preto bisti a drenta e cas y bou di menasa cu arma di candela a bay cu pertenencia di e habitante di e cas. Despues di nan acto e hombernan sospechoso aki a bandona e sitio den un auto shinishi.

 

Mas laat durante investigacion den e area di Tera Korá, Polis a señala e auto den cua e sospechosonan a huy. Polis a para e auto y den e auto a haya pertenencianan cu un rato prome a kita for di habitante di e cas na Groot Sta. Martha. Alrededor di 21:20 a detene ocupantenan di e auto, e hombernan: R.R.R.W. di 20 aña di edad y G.R.M.S. di 19 aña di edad, ambos naci na Corsou.

 

Continuando cu e investigacion, alrededor di 23:30, Polis a bay na un cas na Groot Sta. Martha y a detene e homber K.H.L. naci na Corsou di 17 aña di edad.

Tur tres homber ta sospechoso den e caso di e ladronicia cu violencia ariba menciona.

A presenta e sospechosonan dilanti un Fiscal Auxiliar cu a ordena nan encarcelamento pendiente di mas investigacion.

Leave a Reply

Top