Ladronicia cu violencia y detencion

WILLEMSTAD – Diaranson 12 di juli 2017, alrededor di 8:27 di mainta, Central di Polis a ricibi notificacion di un caso di ladronicia cu violencia cu a tuma luga na un Optica riba Fokkerweg.

 

For di un investigacion preliminar cu Polis a realisa n’e sitio a resulta cu dos homber cu arma di candela a drenta e establecimento y bou di menasa a bay cu un cantidad di bril y un telefon celular for di e sitio.

 

Continuando cu e investigacion den e caso aki, Polis a ricibi informacion cu a señala e antisocialnan den area di St. Jago. Diferente unidad policial a dirigi nan mes p’e sitio p’asina yuda cu e buskeda y pa detene e sospechosonan.

E agentenan policial a señala un homber cu ta cuadra cu descripcion di un di hombernan cu un rato prome a comete e ladronicia cu violencia ariba menciona. A cuminsa cu un persecusion na pia bulando den diferente cura di cas.

 

Alrededor di 8:50, Polis a localisa tres homber sospechoso den e parti abou di un cas den construccion den Sint Jagoberg. Durante detencion di un di e hombernan, Polis a hay’e cu un arma di candela automatico den su poder. Tambe a haya un tas cu un cantidad di bril cu probablemente ta procedente di e ladronicia cu violencia cu rato prome a tuma luga.

Mas aleu a haya e pañanan cu e sospechosonan tabatin bisti na momento cu a comete e ladronicia. Dilanti di e cas, Polis a haya e auto cu probablemete e sospechosonan a uza pa huy for di e establecimento na Fokkerweg.

 

A confisca tur e articulonan ariba menciona y tambe e auto pa mas investigacion.

Polis a detene e hombernan: J.M.H.H. naci na Venezuela di 26 aña di edad; R.A.L.C. naci na Venezuela di 22 aña di edad; y D.S.M. naci na Republica Dominicana di 34 aña di edad.

A presenta e sospechosonan aki dilanti un Fiscal Auxiliar cu a ordena nan encarcelamento pendiente pa mas investigacion.

 

Durante buskeda den Sint Jagoberg, Polis a topa cu un plantacion di marihuana na un cas.

Tambe Polis a haya un catidad di bala skerpi den e cas. A confisca e matanan di marihuana y e balanan skerpi pa mas investigacion.

Leave a Reply

Top