Ladronnan a drenta cas na Esso Heights

Dialuna pa mas o menos 8’or di anochi Central di Polis ta manda un patruye di San Nicolas na un adres na Esso Heights relaciona cu un caso di kiebro.

Na e sitio e Polisnan ta papia cu e señora di inicial L., kende ta declara cu pa mas o menos 6.30 di mainta el a bay traha. Su yiu muhe tabata e ultimo cu a bandona e cas. E yiu a bis’e cu el a bay pa 7.05 di mainta for di eynan y a cera e cas na yabi. Ora cu e denunciante a bolbe su cas despues di 6.30 di atardi, el a constata cu desconocinan a drenta den e cas.

E ladronnan a reboltea e cas y a bay cu diferente cos. Loke cu e por a constata na prome bista cu nan a bay cu 2 flatscreen TV, 2 laptop, 1 playstation 3 cu 20 wega y 3 controller, un cartera berde conteniendo diferente joyas.

E desconocinan a drenta via di e bentana pabou di e cas. Nan a kita e shutternan di e bentana pa por drenta paden.

Leave a Reply

Top