Ladronnan a kibra y horta den Crown

Dia 13 di November den oranan di madruga Polisnan ta wordo poni na altura di un caso di kiebro y robo cu a tuma luga den un negoshi na Dakota.

E informe di Polis ta bisa cu na warda di polis Playa ta presenta un homber pa haci un denuncia. El a bisa cu e ta encarga cu e negoshi Casi Nobo den Caya Avenida Milio Croes. Dia 11 di november ultimo rond di 7’or di anochi, el a cera e luga y a laga esaki intacto atras.

Dia 13 di november rond di 1’or di madruga, e ta ricibi un yamada di e supervisor di inicial M., kende a informe cu e mester presenta na e negoshi relaciona cu un caso di kiebro.

Hunto cu personal di SmartSystem Security el a dicidi di drenta e negoshi pa controla e situacion. Nan a descubri cu e kashinan di glas a wordo kibra. Di loke e por a mira na primera bista, desconocinan a bay cu diferente mercancia, entre otro speaker, playstation, GoPro, IPhone, etc.

Segun nan a averigua, e ladronnan a pasa via di un ducto na e parti west di e edificio y a drenta den e luga. E denuncia a mira un martiuw y un zaag tira riba caminda publico, cual probablemente a wordo uza pa nan drenta paden. Tambe el a mira un koevoet, un mascara di payaso y un petchi preto riba cual ta skirbi “Rockstar” tira den e negoshi bou di  ducto di e airco.

El a keda di traha un lista di loke e ladronnan a logra bay cune pa entrega na Recherche.

Leave a Reply

Top