Laga grupo di The Revival of Palo Marga tuma tur cos over

Aña 2017 sigur tin 3 luna caba cu e pista di Palo Marga no a mira mucho accion y coredornan a cuminsa bira un tiki desespera pa kico lo bay bira e futuro di e deporte, pero principalmente di nan inversionan haci den nan vehiculonan di drag.

P’e motibo aki siman pasa a pidi pa un reunion di coredornan unda mas di 100 driver y doño di auto y bromer a presenta na Club Trappers pa dicidi kico lo por ta mihor p’e pista di Palo Marga y e deporte di drag.

 

For di e reunion aki a sali un mandato cla y raspa pa reactiva e grupo di The Revival of Palo Marga cu na final di 2015 a organisa 2 evento grandi y sumamente exitoso na Palo Marga y a logra genera mayoria di e fondonan necesario p’asina cumpra e timing system nobo p’e pista.

A base di un votacion di e coredoranan presente cu a registra na entrada a sali di biaha un peticion n’e beheerder di Palo Marga pasa e operacion di Palo Marga pa loke ta trata e aña 2017 n’e organisacion di The Revival of Palo Marga 2 y a duna e grupo aki un termino di 2 siman pa nan por informa e coredornan bek di nan plan di accion.

 

Durante weekend mesora a start e proceso di inventarisacion na Palo Marga p’asina den un termino relativamente corto por cuminsa reactiva e deporte di drag aki na Aruba.

E startup aki lo no ta uno facil, pero e team aki ta determina pa haci esaki un realidad den un tempo record y tambe cu e mesun transparencia financiero cu nan a traha cune na 2015 p’asina e deporte di drag y vooral e facilidadnan di Palo Marga por conoce un adelanto substancial den 2017.

 

Pues bon noticia sigur p’e deporte di drag y ta di spera cu prome cu e fin di siman aki lo por tin un anuncio di ki dia e prome actividadnan di drag lo start sali riba e pista di Palo Marga International Raceway Park, mientras cu diasabra awor caba lo cuminsa cu trabaonan di limpiesa y restructuracion pa pone e facilidad den condicion pa cuminsa recibi bishitantenan.

Top