Lecturer Faculty of Hospitality and Tourism Management Studies, Jo-Anne Croes “Mi a cuminsa traha den turismo y el a bira mi pasion”

 

Lecturer Faculty of Hospitality and Tourism Management Studies, Jo-Anne Croes, a termina su estudio na Colegio Arubano, a sigui pa IPA, pero a haya su prome trabou den e industria di Timeshare.

“Ey mi a namora di nos industria di hotel, industria di turismo”, Jo-Anne Croes a indica. Esaki a dun’e gana di bay studia den turismo y el a bay Hulanda pa haci esaki.

 

Na Leeuwaarden el a siña hospitalidad y turismo, unda el a logra su diploma di Bachelor den Hospitality and Tourism Management. Despues di a logra su Bachelor, Jo-Anne Croes a bay pa su diploma di Masters y a haci esaki den su tempo liber, pasobra su pasion a bira turismo despues di a traha den e industria na Aruba.

Jo-Anne Croes a conta cu despues di a logra su Masters, el a dicidi haci su di dos Masters den informacion di tecnologia. El a haci esaki durante e periodo cu internet a inicia y e kier a combina turismo cu informacion digital di tecnologia.

 

Jo-Anne Croes a regresa for di Hulanda despues di su estudio y el a traha 10 aña na Aruba Tourism Authority, unda cu el a traha den Departamento di Digital. Pero na 2012 Jo-Anne Croes a opta pa tin un reto nobo y esey ta unda el a bay Universidad di Aruba, pero pa contribui den concepto diferente.

“Recordando cu mi prome amor tabata pa atende IPA pa bira juffrouw, mi a drenta Universidad di Aruba. Basicamente e tabata mi di dos amor”, Jo-Anne Croes a expresa cu un sonrisa.

 

E ta sinti cu na momento cu el a cuminsa traha na universidad y na lugar cu e ta inspira studiantenan, t’e studiantenan t’esnan cu a inspir’e. Esaki pa motibo cu nan tin deseo di siña y el a identifica su mes cu nan pa siña.

Jo-Anne Croes ta haya cu su trabou no ta pa inspira, pero pa motiva nan y duna nan e curashi pa haya sa kico ta motiva e studiantenan.

Tin personanan ta yega universidad sin sa kico nan kier logra, pero nan ta yega n’e facultad y no necesariamente kier bay den e industria.

 

“Pero asina cu nan ta aki, nan ta descubri nan mes. Nan ta un proceso di descubri cu nan tin e pasion di nos industria, cu ta e pilar di nos economia”, Jo-Anne Croes a indica.

Mirando cada studiante individual y mira kico nan forsa individual ta, p’asina purba desaroya futuro lider pa comunidad.

 

Studiantenan cu ta termina Colegio of  EPI y ta pensando pa atende universidad, specialmente e facultad di hospitalidad, nan mester mira den nan mes kico ta motiva nan y kico ta inspira nan pa sigui cu e estudio.

Si e ta solamente pa no bay Hulanda ainda, laga esey t’e motivacion.

“Bo por keda serca di cas, bo por logra un diploma di Bachelor di Ciencia den Hospitalty and Tourism Management”, Jo-Anne Croes a expresa.

Asina aki e studiante por mira si e ta sigui studia na Hulanda of Merca. Ora di tin e educacion aki, pe persona ta orienta di ta servicial pero no pensa solamente den e industria di hospitalidad. Tur area di trabou ta orienta di ta servicial, pasobra ta duna servicio na cliente, bishitante.

Unabes cu cuminsa den e industria di turismo, e ta bira dificil pa no stima e industria.

 

Aruba Hotel & Tourism Association ta masha orguyoso di talentonan asina y p’e motibo aki AHATA ta comparti e storia y e carera di Jo-Anne Croes den nan seccion di “Ami ta Turismo”.

 

Leave a Reply

Top