Ley pa deduccion di belasting pa fiansa di estudio a drenta Parlamento, Evelyn Wever-Croes a declara

Partido MEP tin dos aña caba ta trahando riba un proyecto di ley pa haci e repago di e fiansa di estudio deducible di belasting. Gobierno nunca tabatin un incentivo real pa trece nos studiantenan bek despues cu nan termina nan estudio den exterior.

 

Gobierno di Mike Eman a bin cu un descuento di 30 prociento rib’e fiansa si esaki wordo paga den un solo pago, locual Partido MEP no ta haya ta logico considerando cu studiantenan ta keda cu un debe di mas di 100 mil florin y no tin e placa pa paga nan fiansa den un solo pago. Si nan tabatin e cen aki lo nan no a recuri na fiansa mes. E idea aki cu AVP a bin cu ne no a surti ningun efecto, segun lider di MEP.

 

“Dos aña pasa, nos a bin cu e proyecto di ley pa haci e re-pago di fiansa di estudio completamente deducible di belasting. E proceso aki a tranka cierto momento pa motibo di consehonan cu nos a ricibi y cu mester a tene cuenta cu nan. Den nos proyecto di ley nos tabata falta un paragraf di e consecuencianan financiero cu e cambio lo causa.

 

Ta lamentable cu despues di intentonan, nos no a haya e cooperacion necesario for di Gobierno p’asina traha rib’e paragraf rekeri p’asina evita cu atrobe un ley di nos bay para den un lachi di Parlamento, sra. Wever-Croes ta splica.

 

“Sinembargo, un biaha mas ta keda confirma cu Partido MEP ta gobernando for di oposicion y esaki ta un bon noticia. Gobierno recientemente a entrega un proyecto di ley na Parlamento identico na esun cu nos a traha p’asina haci tur e re-pagonan di fiansa di estudio deducible. Cu practicamente mesun principionan cu loke nos a bin ta anunciando durante dos aña. Sinembargo, tin un diferencia entre e proyecto di ley di Gobierno y esun cu Partido MEP a propone”, sra. Wever-Croes ta mustra.

 

FIANSA PA ESTUDIO SIN INTERES

“MEP no solamente a propone pa haci e re-pago deducible. Esaki sigur lo yuda pa nos studiantenan bin bek. Pero nos a bay un paso mas leu cu Gobierno ainda no a tuma.

Esaki ta pa duna e studiantenan un fiansa pa estudio sin cobra interes, “Studievrij lenen”, locual na Hulanda ya caba ta asina.

 

Na Aruba p. e. na IPA, un studiante lo no paga interes. Esaki ta locual nos kier pa bira aplicabel na tur fiansa di estudio, considerando cu esaki lo trece alivio grandi pa tur studiante. Esaki lo motiva studiantenan cu ta bay studia den exterior bin bek y aplica loke nan a bay siña p’e”, segun lider di MEP.

 

Sra. Wever-Croes ta termina bisando, “Nos ta contento y e pueblo di Aruba mester wordo felicita cu e ley aki a yega Parlamento aunke cu ainda no tin fecha pa e wordo trata.

No tin motibo pa tarda pa esaki pasa. Nos di Partido MEP ta ansioso wardando e reunion aki wordo yama p’asina durante e tratamento di e ley nos bin cu e extra paso p’asina nos yega na un “studievrij lening” pa e hobennan sigui studia cu un prestamo sin tin mester paga interes tambe”.

Top