Lider di D66 Alexander Pechtold entusiasma despues di encuentro cu Eman y Yrausquin “Aruba ta un isla unda tin hopi oportunidad”

DEN HAAG – Den su oficina den edificio di Tweede Kamer, Prome Minister Eman hunto cu Minister Plenipotenciario, tabatin un encuentro cu Alexander Pechtold, lider di partido D66.

 

E partido cu den eleccion di siman pasa a saca 19 asiento y no ta descarta e posibilidad cu e ta bay forma parti di e Gabinete Hulandes nobo.

Despues di a sinta cu Eman, Pechtold a bisa cu semper ta bon pa tin un bon combersacion cu Prome Minister Eman ora e ultimo aki ta na Hulanda.

 

Segun Pechtold, “Awor cu eleccion aki ta tras di lomba mi ta mira posibilidad pa cu gran entusiasmo recoge e relacionnan den Reino. Esaki ta hopi necesario pasobra e ultimo añanan esaki no semper tabata algo alentador, mientras cu por ta asina.”

 

Pechtold a splica cu tanto den e programa di D66 como tambe den pasado semper a duna muestra cu e partido ta mira e relacionnan den Reino como algo valioso, cu e partido ta haya e relacion cu Aruba masha importante.

 

“Nos ta mira cu na Aruba tin asuntonan cu nos mester pone atencion na nan, pero tambe cu Aruba ta un isla tambe unda tin hopi oportunidad. E ultimo aki mi ta haya cu e Gabinete nobo mester señala. E oportunidad di un cooperacion”, Pechtold a mustra.

 

Pechtold tabata dies aña pasa Minister di Asuntonan di Reino y tin experiencia den esey.

“Mi ta spera cu e relacion di D66 y Aruba y e otro islanan Caribense di Reino ta keda, manera semper, hopi bon”, Pechtold a conclui.

Top