Lider di fraccion Marlon Sneek: Lider di MEP kier ley di integridad, pero no sa cu e ley ta na Parlamento caba

Cu gran sorpresa a tuma nota den medionan di comunicacion, cu e lider di partido MEP, Evelyn Wever Croes y su partido, lo tin intencion di introduci un ley di integridad pa gobernacion di e pais.

Segun e lider di MEP, “Aruba merece gobernantenan cu ta bisa loke nan ta haci, y ta haci loke nan ta bisa,” sin cu e ta tuma nota cu e prome yama pa obedece e dicho aki, ta Evelyn Wever Croes y henter su fraccion.

Esaki lider di fraccion di AVP, Marlon Sneek, a mustra den conferencia di prensa ayera mainta, caminda el a mustra cu aki un biaha mas den palabranan di e propio lider di MEP, cu nan no ta funciona como Parlamentarionan y ta cobrando placa di pueblo sin cu nan ta cumpli cu nan obligacionnan pa representa pueblo den Parlamento.

 

“Pa nos sorpresa nos a tuma nota di declaracion di lider di MEP, Evelyn Wever Croes ta mustra cu su partido lo bin c’un ley di integridad pa Ministernan cu sigur a yama nos atencion ya cu e ta duna nos indicacion cu su persona no a ni lesa e ley cu mi persona a entrega na Parlamento y cu recientemente a bira asina yama ‘OV klaar’ loke ta nifica cu e ley t’asina ley cu e lo por wordo trata den reunion publico di Parlamento.

Pasobra e puntonan cu nos por a tuma nota di su declaracion, ta puntonan meramente cu nos ta bay atende den e ley cu ta traha caba y entrega na Parlamento y nos ta mira un biaha mas cu e lider di MEP ta haci populismo, creando e idea of sensacion cu aki na Aruba no tin ley y no tin nada regla.

 

Aki nos tin cu bisa cu pronto nos ta bay tin un ley di screening di Minister, ya cu nos tabatin un ‘Landsbesluit’ y awor nos ta bay pa un ‘Landsverordening’ cu ta un herarkia un tiki mas halto y banda di esaki nos ta bisa tambe cu pronto e ley di financiamento di partidonan politico, tambe  lo wordo entrega na Parlamento pa miembronan di fraccion di AVP.

Pa loke nos a yega di mustra caba e lista cu nos a pone pa nos mes pa atende cune pa loke ta integridad, un di nan tabata tambe ‘ombudsman’ y e ley aki ta na Parlamento caba tambe pa wordo atendi,  ‘gedragscode’ di Minister- y Parlamentarionan, nos tin cu bisa cu esaki tambe ta cla y lo bay wordo trata den e comision ‘di Huishoudelijke Aangelegenheden’ pa despues e bay pa Parlamento p’e wordo aproba.

 

Nos a bin tambe cu e ley di financiamento di partidonan politico, e ley di integridad di Ministernan y un ley cu sigur nos falta ainda, t’e ley di ‘klokkenluiders’ cu ta forma parti di e cinco puntonan cu nos a pone como meta pa introduci esakinan y nos falta solamente uno.

Sigur nos tin cu bisa danki na fraccion di AVP cu a haci su esfuerso pa garantisa y produci e leynan aki sin cu tin un asina yama ‘wetgevingjurist’ den servicio, pero ta Parlamentarionan di AVP a traha duro hunto cu otro huristanan pa pone e leynan aki riba pia.

 

 

Pa colmo awor e lider di MEP ta papia cu dia su partido MEP bin den Gobierno, e lo bin cu e leynan aki y aki nos tin cu bisa Evelyn Wever Croes cu no mester di MEP den Gobierno, ya cu e leynan aki ya ta cla y ta bay bin caba ya cu nan t’asina ley, entrega y trata y pronto lo bay trata esakinan den reunion publico pa nan aprobacion.

Por ta dor cu Evelyn y su fraccion no ta bin trabou pa cumpli cu nan obligacion manera ta nan responsabilidad, e no sa kico ta pasando den Parlamento, pero pa mas informacion e keda pendiente ya cu pronto e lo haya invitacion p’e ley di screening di Ministers, lo wordo trata den Parlamento ya cu e ley t’asina ley caba pa nos trata esaki den Parlamento.

 

Ta di lamenta cu politiconan asina pa haci e tipo di declaracionnan aki y na mes momento ta confirma cu nan no ta presenta na trabou y no ta na altura di tur loke ta pasa den Parlamento,” lider di fraccion di AVP, Marlon Sneek ta declara.

 

 

Top