Lider di MEP, Evelyn Wever-Croes: MEP lo duna docentenan participacion real y mas voz den maneho di enseñansa

Lider di MEP, Evelyn Wever-Croes a elabora riba algun aspecto di e vision di MEP pa mehora nos enseñansa.

“Nos ta reitera nos compromiso pa duna docentenan mas voz den decisionnan importante rib’e tereno di enseñansa y pa duna nan participacion real. Pasobra ta docentenan sa kico ta biba den e area di enseñansa y no tin miho cu nan pa trece e preocupacionnan y solucionnan padilanti”, segun Wever-Croes.

 

“Una bes cu MEP ta den Gobierno nos lo enfoca riba tres area den enseñansa. E calidad di enseñansa y digitalisacion di enseñansa mester haya mas atencion pa nos garantisa cu nos studiantenan por continua estudionan den exterior sin problema y pa garantisa cu esnan cu bai traha despues di caba scol, por haya trabou sin problema.

Den esaki e uzo di idioma Papiamento como idioma di instruccion pa klasnan 1-3 tambe ta forma parti”, e lider di MEP a mustra.

 

“Di dos area ta e infrastructura di e scolnan. Nos a haci un inventarisacion caba di estado di tur scol na Aruba y nos tin un dossier traha pa na momento cu MEP drenta den Gobierno por pone atencion caminda mester cu prioridad. Nos no mester perde tempo e ora mas pa haci e estudionan, nos tin nan cla caba”, Wever Croes ta continua bisando.

 

“Y di tres area ta cu mester amplia e ayudo y sosten na docentenan p’asina e docente por encarga su mes mas na duna les y sinti su mes bon haciendo esey.

Esaki ta nos compromiso pa mehora enseñansa na Aruba. Nos muchanan ta e fundeshi di nos comunidad. Y ta nos deber di duna nan un miho calidad di enseñansa.

Hopi docente cu mi a papia cu nan ta di acuerdo cu esaki y ta dispuesto pa comparti nan vision pa crea e miho calidad di enseñansa cu ta posibel. E unico cos cu nan kier ta pa nan wordo scucha, y pa nan tin un participacion REAL. Nos a compromete cu nos si lo duna nan e participacion ey”, Evelyn Wever-Croes a duna di conoce.

Top