Lider di MEP, Evelyn Wever-Croes: MEP lo duna pensionadonan prioridad!

Lider di Partido MEP, Evelyn Wever-Croes ta enfoca riba nos pensionadonan, cu a wordo lubida y perhudica pa e Gobierno na mando. MEP lo duna e pensionadonan prioridad.

Ata aki algun di e puntonan cu MEP lo duna prioridad, mesora cu MEP drenta den Gobierno.

 

CREA MAS CAPACIDAD PA CUIDO DI NOS GRANDINAN

Mas y mas di nos grandinan no por keda biba na cas, y mester bay biba den un cas di cuido. Lamentablemente e capacidad actual no ta suficiente y nos grandinan mester warda largo prome cu por haya un lugar den un cas di cuido. Esaki ta causa hopi biaha problema den famia y por afecta e calidad di cuido di nos grandinan.

Wever-Croes ta sigura cu MEP lo amplia e capacidad di cuido, p’asina por brinda mas di nos grandinan oportunidad den casnan di cuido, cu cuido especialisa.

 

DOKTER SPECIALISA DEN CUIDO PA NOS GRANDINAN

Actualmente no tin suficiente dokter na Aruba cu ta specialisa den cuido di nos grandinan, geriatria. Cu mas geriatra na Aruba, bo por wordo garantisa un miho cuido.

E geriatra lo sa di referi pashentnan mas lihe na demas specialistanan, p’asina bo no tin nodo di warda asina tanto prome cu wordo atendi pa un specialista, Wever-Croes ta splica.

 

ELIMINA COBRANSA DI BELASTING RIBA PENSIOEN DI BIEHES

Pensionadonan ta esnan cu mas a wordo castiga cu cobransa halto di belasting, ora nan tin mas cu un pensioen of otro entrada.

Wever-Croes ta bisa cu MEP lo cambia e ley pa elimina e belasting riba e pensioen di biehes, y asina bo no ta haya mas cobransanan halto asina den caso cu bo tin mas entrada.

MEP ta di opinion cu nos grandinan a traha duro y a paga suficiente belasting caba.

 

Ademas, nos grandinan ya caba a bay atras den entrada na momento di bay cu pensioen, y e cobransanan aki di belasting ta causa mas problema financiero. MEP kier pa nos grandinan por gosa di nan seneltud contento, y p’esey nos compromiso ta pa alivia e peso financiero aki.

 

Tambe MEP ta di opinion cu nos mester garantisa cu tur pensionado cu tin solamente pensioen di biehes, no tin nodo di yena nan formulario di inkomstenbelasting mas.

Esaki ta crea solamente mas molester y preocupacion pa nos grandinan.

 

REBAHA PRIMA AZV RIBA PENSIOEN

Entrante 1 di januari 2011, Gobierno di AVP a introduci un medida cu a afecta specialmente nos grandinan. Gobierno a aumenta e prima di AZV di 9.5% pa 11.5%, y na 2015 a baha esaki na 10.5%. Como pensionado, abo mester paga e prima aki completamente.

Un persona cu ta den servicio di un doño di trabou ta paga 1.6%, y su doño di trabou ta paga e sobra, pero un pensionado mester pag’e completo. No ta tur pensionado ta paga e prima aki, pasobra SVb ta paga e prima di AZV pa esnan cu tin un pensioen di biehes solamente.

Pero si bo tin mas entrada, ta abo mes mester paga esaki. E medida aki di Gobierno a afecta hopi pensionado cu mester paga e prima aki.

Segun Wever-Croes, Partido Movimiento Electoral di Pueblo lo rebaha e peso di e prima di AZV pa e pensionado.

 

NOS GRANDINAN LO HAYA PREFERENCIA NA OFICINANAN DI GOBIENO Y BANCONAN

Partido MEP lo traha pa inculca den nos comunidad mas respet y atencion pa nos grandinan. Pa duna nos grandinan preferencia ora nan ta para den rij, pa crea rijnan special pa nos grandinan ora di bay oficinanan di Gobierno of banconan, pa educa nos hobennan pa lanta y laga un hende grandi sinta si no tin mas luga di sinta, pa trata nos grandinan cu cariño y pasenshi, ta vision di lider di MEP, Evelyn Wever-Croes.

Top