Lider fraccion di AVP, sr Marlon Sneek: “Pabien na directiva nobo di Fundacion Digna Lacle Herrera”

Parlamentario Marlon Sneek den nomber di fraccion di AVP, ta manda palabra di pabien na Fundacion Digna Lacle Herrera, cu diamars ultimo a instala un team nobo cu ta bay dirigi e fundacion aki pa hiba e fundacion aki n’e siguiente nivel.

Mescos cu e slogan cu e fundacion ta uza di ‘level up’ e team nobo aki lo haci e trabou di ‘level up’ manera ya caba AVP ta conoci p’esaki.

 

Fundacion Digna Lacle Herrera ta un fundacion di formacion di Partido di Pueblo Arubiano y poco t’e partidonan aki riba nos isla y sigur den Reino, si nos mira nos islanan bisiña manera Corsou y Sint Maarten, poco t’e partidonan cu tin un fundacion asina cu ta encarga su mes den formacion di su candidatonan y den formacion y educacion di pueblo en general.

 

Na nomber di fraccion di AVP, lider di fraccion sr. Marlon Sneek, ta manda palabra di pabien na sr. Raycond do Nascimento, kende ta Presidente di e fundacion y sigur palabranan di pabien y hopi, pero hopi forsa y hopi curashi pa cada un di e miembronan di e fundacion aki, esta sra. Esther Gomes, sres. James Sneek, Tyson Lopez, Maurits Malmberg, Carlyle de Couteau y tambe sra. Gerlien Croes, kendenan a asumi e responsabilidad aki.

 

Nos por bisa c’un biaha mas nos un team cu ta consisti di profesionalnan manera e.o. drs. Do Nascimento, kende a caba di promove como doctor, sra. Gomes kende termina su estudio como hurista – abogado, sra. Croes tambe, sr. Sneek kende ta criminoloog, y tambe nos a tuma nota di  Carlyle de Couteau, kende ta Director y Hefe di e Departamento di Directie Scheepvaart, sr. Tyson Lopez, kende tambe ta un hoben bon prepara.

 

Nos ta desea nan un biaha mas hopi exito y nos ta spera como fraccion di AVP p’e cursonan pa nos miembronan tambe sigui desaroya nos mes como fraccion di AVP pa di e forma aki nos sigui aporta na nos comunidad.

Nos ta den rumbo pa eleccion y ta importante pa Partido di Pueblo Arubiano y candidatonan nobo cu ta acercando partido kendenan lo bay asumi responsabilidad pronto, tambe ta bon prepara riba e nivel ey cu nos ta custumbra di dje y cu Fundacion Digna Lacle Herrera ta conoci pe.”

 

 

Top