Loke cu a pasa na Corsou Ta pueblo mes mester sa di coregi cu su comportacion Segun Alex Rosaria

“Palabra ta difícil despues di e asesinatonan cu a tuma lugar diasabra na Còrsou. Mi ta manda condolencia pa famia y amigonan di e defuntonan. Mi tin hopi dolor. Ta normal cu ta puntra unda nos ta bay y ta fácil pa tira falta riba e ‘otro’ sin cuestioná kico nos a haci o keda sin haci cu a hiba nos aki”, na palabra Alex Rosaria saca for di su blog.

 

E cantidad ridículamente halto di asesinato no ta djis un asunto di violencia di gang. Sea cu e asesesinatonan di diasabra resultá di ta relatá cu gang òf no, laga nos realisá cu ta un problema cu mester preocupá nos tur como yiu di Còrsou.

E asesinatonan aki ta causa un ambiente di miedo cu ta afectá henter nos comunidad. E ta menasá progreso y tur avanse cu nos a conocé como pueblo.

 

E ta comprometé e cosnan cu ta haci Còrsou un perla den laman y cu ta pone nos bisa cu nos ta oruyoso di ta yiu di Còrsou. No ta un cuestion di ‘nan cu nan’, pero un asunto di nos tur.

E no ta un problema cu Gobièrno o un Minister di Husticia so por solucioná. Pa colmo no ta existí un solucion di awe pa mañan.

Ta obvio cu nos mester invertí mas den Cuerpo Policial, ekipo, tecnologia ‘state-of-the art’ y hende pa ekipá esaki.

Mester un protocòl pa pone tur actor den e cadena hudicial traha y intercambiá inteligencia cu otro.

 

Tin mucho division den y entre e diferente actornan. Posiblemente un ‘team openbare veiligheid’. E cantidad di arma cu ta drenta nos pais mester ta un prioridad. Tampoco por laga e porta cu ta keda drei permitiendo e mesun hendenan drenta prison, sali, bolbe drenta, keda habrí.

Represion ta importante, pero p’ami e aspecto principal pa restablecé seguridad ta pa duna tur nos yiunan speransa y aceso igual na oportunidad pa hiba un bida decente y contento, Alex Rosaria a sigui bisa.

 

“Nos mester crea un comunidad den cua tur hende por sinti cu nan potencial como individuo y grupo ta alcansabel y cu esaki no ta un soño cu solamente un man yen di hende por realisá.

Nos mester di mas hende cu ta modelo pa nos comunidad.

Políticonan mester realisá cu banda di maneho y ser Parlamentario nan tin un deber cu nos hendenan pa tin un comportacion cu ta inspirá y no un di decadendia.

Religiosonan mester realisá cu si nan mes, hopi biaha cu inpunidad, ta faya cu ley, moral y nan vocacion, nan no por ta un ‘role model’ pa nos comunidad.

Y mescos ta conta pa nos organisacionnan di deporte, recreo y social caminda definitamente nos por haci cosnan mihor.

 

Laga nos ta sincero y admití cu nos a crea un isla di ‘nan’ y ‘nos’. Ta p’esey hopi hende den e casonan di asesinato manera nos a conocé ta papia di ‘nan cu nan’. Mi sa, mi a tende un lider político bisa mescos despues di e dòbel asesinato na Hato.

Nos mester traha riba un comunidad di inclusion caminda nos ta percura cu no pasobra nos yiunan ta bay tal skol, ta biba den tal bario, tin tal tipo di cabey, ta papia tal idioma, tin tal preferencia sexual o ta di tal religion o credo, nan no ta conta.

For di 1954 nos no a haci suficiente pa crea un bon sistema di educacion, programanan social, un economia cu ta crece y crea cupo di trabou.

Pues laga nos no hunga wega político cu e tragedia aki. Y nos como mayor tin un enorme tarea nos dilanti.

 

Nos t’e piesa central. Nos mester t’e ‘role model’ principal pa nos yiunan cu nos comportacion y pa crea speransa serca nan. Nos como mayor mester wak nos mes den spiel y coregí nos comportacion. Laga nos haci’é pa nan. Pa nan futuro. Pa nos pais”, Alex Rosaria a conclui su mensahe.

 

 

 

 

 

Leave a Reply

Top