Lorna C. Varlack Jansen AVP a tene reunion di contacto y informativo

Siman pasa e miembro di Parlamento pa fraccion di AVP, sra. Lorna C. Varlack Jansen, a tene su prome reunion di contacto na San Nicolas y cual reunion a conta cu interes hopi grandi.

Partido AVP manera ta un custumber caba, ta sigui den contacto cu pueblo di Aruba, informando riba ehecucion di su programa di gobernacion cual ta visibel den practicamente tur bario rond Aruba, y na mes momento ta scucha deseo y comentario di pueblo riba kico nan ta spera ainda of kier mira wordo realisa den nan bario.

 

Lorna C. Varlack Jansen hunto cu otro coleganan di partido a combersa cu e publico presente y e anochi a transforma su mes un evento hopi importante caminda fuera di duna informacion na tur presente di e desaroyonan cu tin den tur bario rond Aruba,  a ricibi informacion tambe di deseonan di habitantenan di e bario di San Nicolas, riba loke nan kier mira ainda wordo ehecuta.

Na mes momento a combersa riba asuntonan general di e pais, pero tambe preocupacion cu lo por tin pa un of otro asunto loke a haci e reunion uno sumamente ameno y positivo.

 

AVP lo sigui cu e tipo di reunionnan aki den proximo siman- y lunanan pa sigui informa pueblo riba ehecucion di e programa di gobernacion y tambe pa haya datonan cu lo sirbi pa formula e siguiente programa di gobernacion p’e proximo 4 añanan di gobernacion.

 

Top