Lotto a felicita e delegacion hubenil di Aruba pa cu nan prestacion na Santiago de Chili

Den luna di juli, Lotto por medio di Comision di Subsidio a percura pa mayoria di nos atletanan den preparacion p’e Weganan Sur Americano Hubenil Santiago 2017 atende un campo di entrenamento combina cu competencia p’asina nan ta mihor posibel prepara p’e weganan di Santiago.

Nos atletanan a hiba un preparacion debido bou guia profesional cu ayudo di nos entrenadornan local na paisnan manera Colombia, Cuba, Peru, Ecuador y e propio Chile.

Na banda di e entrenamentonan nan a competi den torneonan renombra p’asina midi nan nivel y purba na mehora nan mesun prestacion.

 

E tremendo resultado obteni den e di dos edicion di e Weganan Sur Americano Hubenil a bisa hopi di e preparacion di nos atletanan y ta cuadra cu e vision di Lotto.

Mirando e logro di un medaya di Oro, Plata y Brons pa nos atletanan Chaira Petrocchi, Sophia Petrocchi y Keeley Maduro den e respectivo deportenan Taekwondo, Judo y Landamento entre e paisnan participante ta bisa hopi di e calidad y nivel di nos atletanan.

 

Cu un delegacion di apenas 11 atleta di comparicion cu e otro paisnan den e continente, Aruba sin duda por ta super contento y orguyoso di e resultado obteni pa nos atletanan hubenil.

Lotto, e loteria di Aruba kier a felicita e delegacion hubenil y e staf di entrenadornan, e federacionnan deportivo, nan mayornan y COA cu e tremendo logro aki na Chile.

Top