Lotto contento di por aporta na e careda di mas grandi y prestigioso na Aruba, e 57th Aruba International Boulevard Race

Aruba International Boulevard Race ta e evento di coremento na pia di mas popular y bieu na Aruba. Un evento semper teni en conexion cu e celebracion rond di Dia di Rey esta 27 di april (antes Aña di La Reina, 30 di april).

 

E aña aki e pretigioso careda aki lo celebra nan di 57 edicion. Pa varios aña Oranje Vereniging, bou guia di Jos van der Schoot, den feliz memoria a host e careda hunto cu ayudo di e conocido  comerciante di Sport Caribe, sr. Harry Jansen kende tabata e iniciador di e prestigioso Boulevard Loop.

 

E tempo ey e careda tabata tin masha poco participante pero den e ultimo 10 añanan alrededor di 700 persona ta participa na esaki. Varios coredor femenino y masculino a yega di triunfa den esaki pa nos menciona un par, Lia Melis, Shariska Winterdaal, Dick Paschier, Willy Willems, Richard Rodriguez, Ronald Staring, Rudsel Martina y Amadeo Kemper, e dos ultimonan di Corsou.

 

Den 2016, un total di 630 participante a competi den e careda aki cu tin un recorido di 10km y ta inicia na Malmok y caba na Aruba Port Authority. Tabatin coredornan di Corsou, Merca, Venezuela, Suecia y mas cu claro Aruba. E di 57 edicion di e Boulevard Race lo ta diahuebs 27 di april proximo cuminsando pa 5:30 di atardi. E aña aki e organisacion lo ta pa prome biaha den man di Aruba Triathlon Association despues cu pa hopi aña esnan di Aruwac a organisa esaki.

 

Un danki sigur na Lotto, e Loteria di Aruba pa medio di Comision di Subsidio cu a yuda subsidia e di 57 edicion di Aruba International Boulevard Race organisa pa Aruba Triathlon Association.

Top