Lotto ta felicita Federacion di Taekwondo cu su campeonato nacional

Diasabra ultimo, Federacion di Taekwondo, ARTBO a tene su campeonato nacional di taekwondo pa tur scol miembro den Centro Deportivo Frans Figaroa na Noord.

Na mes momento a pone e campeonato den cuadro di e celebracion riba Dia di Betico 2017. Aruba Taekwondo Bond pa medio di su Presidente, dr. Guaicaipuro Jimenez a habri e mainta splicando e desaroyo di e deporte di combate na Aruba y tambe unda lo kier mira taekwondo di Aruba den futuro cercano.

Nos tin hopi potencial y taekwondo di Aruba ya ta reconoci mundialmente unda nos atletanan ta destaca den bon forma participando na eventonan grandi manera G1.

 

Mester bisa cu mayoria scol a atende e campeonato caminda e participacion tabata hopi grandi cu varios pelea interesante.

Remarcabel ta cu tur e combatenan tabata riba nivel, esaki di chikito te cu esnan mas grandi. Como e mihor bringador femenino infantil a resulta Jewel Illigde di San Nicolas Taekwondo, e mihor bringador masculino infantil Dilon Brown di Brazil Taekwondo Dojang.

Mihor bringador femenino cadet, Rushineldy Lejuez di San Nicolas TKD, mihor bringador masculino cadet Shandirow Schmidt di Brazil Taekwondo Dojang.

Mihor bringador masculino junior Zahyon Klaberdi Brazil Taekwondo Dojangy y e mihor Team a bira San Nicolas Taekwondo.

Den su calidad como Presidente di St. Fundacion Lotto pa Deporte, sr. Di-Stefano Wernet RA tambe a haci acto di presencia n’e campeonato nacional di taekwondo.

 

Un danki sigur na Lotto, e Loteria di Aruba pa medio di Comision di Subsidio cu a subsidia e eventonan deportivo enconexion cu e celebracion riba Dia di Betico.

 

Top