Luigi Bergen di MEP: Integridad Green = Corupcion Green!?

Invadi Cas di Minister

Riba 28 di maart ultimo, Ministerio Publico a invadi 13 establecimento. E. o. a invadi cas y oficina di e sospechoso, sr. Paul Croes, Minister di Trabou.

E invasion aki ta basa riba un investigacion preliminario di hechonan, un asina yama ‘feiten-

onderzoek’. E ‘feitenonderzoek’ a converti den un investigacion penal, un ‘strafrechtelijk onderzoek’. E sospecho di e investigacion ta relaciona cu soborno y labamento di placa, segun Luigi Bergen.

 

Trahador ilegal

Na cas di e Minister a topa cu un trahador ilegal. A detene e persona aki y a deport’e pa su pais natal. Cu e Minister mes, kende ta institui ilegalidad y ta comete infraccion contra ley, den e caso aki nada no a pasa, Bergen ta splica.

 

Accion di Minister

Minister despues di e sucesonan aki, esta invasion na su cas y detencion y deportacion di un ilegal, a papia cu Prome Minister y e dia siguiente a pone su mes riba ‘non-actief’.

Un acto ridiculo, un acto ilegal, te hasta un acto anti-constitucional. E ta mantene su poder como Minister, djis e no ta trahando activamente.

Ami ta convenci cu e ta sigui traha tras di cortina y ta ‘business as usual’ manera e dicho ta na Ingles. E ultimo aki ta hacie un acto inmoral, Bergen ta continua bisando.

 

Integridad di Gobierno

Gobierno como Organo Ehecutivo mas halto di Pais Aruba ta perde cara, pa falta di integridad di e Minister y pa falta di integridad di e Prome Minister. E hecho cu e Minister di Trabou mes tabata tin un ilegal ta traha p’e, a wordo gara pa autoridad competente, ta motibo suficiente pa su persona retira como Minister.

Prome Minister cu tambe ta na altura di e hecho aki mester a conseha e Minister di Trabou pa entrega su retiro na Gobernador. E mester a pidi audiencia cu Parlamento pa kita confiansa den e Minister di Trabou, Bergen ta mustra.

 

Palabra ta na Parlamento

Despues cu Minister di Trabou y Prome Minister a actua ilegal, anti-constitucional y inmoral awor e palabra ta na Parlamento. Fraccion di MEP a actua corecto y diligente pa pidi un reunion, cu caracter di urgencia, tocante e asunto bergonsoso aki.

Presidente di Parlamento, pa falta di seriedad y honestidad, ainda no a yama e reunion.

E reunion no ta pa discuti e investigacion penal. Esey ta den man di Ministerio Publico.

E acusacion di soborno y labamento di placa ta bergonsoso si pa un Minister.

 

E pregunta cu Parlamento mester debati riba dj’e ta: Sr. Paul Croes por keda funciona como Minister, awor cu a gara un ilegal den su cas, di cual e tabata sa di dj’e?

Corda cu su persona ta e mandatario cu ta duna permiso pa hende traha na Aruba.

Su persona mester ‘uphold the law’ y controla p’e no wordo viola! Ami ta di opinion cu p’e acto aki so caba, institui ilegalidad, Parlamento mester pasa Mocion di Desconfiansa contra su persona y retir’e como Minister di pais Aruba.

Den e reunion aki lo haya sa si fraccion di AVP lo sostene fraccion di MEP y para pa integridad, Bergen ta conclui.

Top