Luitenant-Kolonel di Kmar a ricibi Minister Arthur Dowers na su oficina

WILLEMSTAD – Diahuebs mainta, e Brigadecommandant di Koninklijke Marechaussee (Kmar), luitenant-kolonel J. Vroegh, a ricibi Minister di Husticia mr. drs. Arthur Dowers, den su oficina principal.

E bishita di trabou aki ta den cuadro di intercambio di informacion y p’e Minister pone su mes na altura di e ultimo desaroyonan riba e lasonan estrecho di cooperacion pa loke ta trata combatimento di crimen.

 

T’asina cu tur pais den Reino ta haciendo uso di e ayudo riba e tereno hudicial for di e Kmar. Pero cada un pais individual den Reino Hulandes ta solicita e ayudo, basa riba criterianan saca for di analisis cu ta wordo realisa.

Asina aki tambe Minister Dowers a solicita yudanza for di Kmar riba varios aspecto na bienestar general y di seguridad pa nos Pais.

 

Un di nan por ehempel, tabata na momento cu Minister Dowers a institui un sub-departamento hudicial nobo den Cuerpo Policial, cual lo keda encarga netamente cu traficacion di hende.

E departamento aki ta cay directamente bou di e departamento encarga cu Crimen Organisa, esta U.G.C. Basa riba e bon relacion cu Minister Dowers tin cu Kmar, su persona a solicita nan, pa nan pone un persona cu ta specialisa den e ramo di traficacion cu hende, na desposicion di KPA y cual esaki t’e caso tambe.

 

Un otro departamento fundamental cu Minister Arthur Dowers a haci peticion pa Kmar pone un specialista, ta den e departamento nobo cu ta wordo yama Fusion Center. Un departamento cual lo tin tarea prinicpal di trece tur departamento gubernamental hunto, pa di e forma aki logra mucho mas exito contra di crimen organisa.

E Fusion Center aki ta cay directamente bou responsabilidad di Procurador General di Pais Aruba y tin varios departamento gubernamental cu mester a pone un di nan expertonan disponibel pa cu realisacion di esaki.

 

Asina aki tambe tin mas ehempel di bon cooperacion cu Kmar ta brinda na nos Pais. Luitenant-kolonel Vroegh a keda masha contento cu e bishita di Minister di Husticia, mr. drs.Arthur Dowers y a gradici su persona p’e tremendo trabou cu su persona a desplega durante su periodo como Minister di Husticia, como tambe p’e plan di maneho solido cu e Minister a construi riba dje, cual no solamente ta haci combatimento di criminalidad uno mucho mas facil, pero sigur riba un base duradero. Es decir cu e frutonan di esaki cada bez lo bira aun mas visibel segun transcurso di e añanan nos dilanti.

 

 

Top