Maestro, un profesion cu un rol importante den desaroyo di mucha

Den cuadro di IPA su Dia Publico 4 di november binidero

 

Tur aña e interes pa studia na IPA ta grandi.

Iwert Gordijk, studiante di e di dos aña, ta conta su motivacion pa studia na IPA.

“Mi motivacion pa studia na IPA ta cu mi kier hunga un rol importante den e desaroyo di mucha. Tin hopi mucha cu no tin e figura di tata na cas. Mucha tin mester di e figura di un tata, kende nan por confia y cu ken nan por papia of desahoga nan mes.

Na IPA ta haya diferente modulo cu ta siña con pa anda cu mucha y con tin cu anda cu situacionnan dificil cu lo por topa cun’e den klas den futuro.

Dor di studia na IPA bo ta siña con pa plania y asina logra resultado positivo.

Na IPA bo ta traha ambos, individual y den grupo.

Den mi prome aña, durante e periodo di practica, mi a siña hopi na mi scol di practica. Muchanan no ta custumbra di tin un maestro masculino cu ta duna nan les.

Mi a sinti mi na cas na mi scol di practica y esey ta mi motivacion pa caba mi estudio na IPA.”

 

IPA ta invita particularmente henter e comunidad di Aruba pa asisti na su Dia Publico p’asina cera conoci cu nos instituto en general y e ambiente estudiantil en particular, conoce nos facilidadnan y tambe pa haya informacion di loke IPA ta haci.

IPA ta invita tur studiante di HAVO, VWO, EPI y tur otro persona interesa pa cuminsa un estudio pa maestro, pa asisti n’e Dia Publico aki dia 4 di november 2017.

IPA su Dia Publico lo ta di 10or di mainta te 2or di atardi.

 

Durante e Dia Publico aki lo duna informacion general di e estudio di maestro pa Enseñansa Primario, Movecion y Salud, Bachelor Papiamento, Bachelor Hulandes, Bachelor Ingles, Bachelor Spaño y Master Educational Needs.

Banda di esaki lo tin presentacion di proyecto di studiante y exposicion di e diferente areanan di formacion di e estudio di maestro pa haya un miho bista riba kico e estudio ta encera.

 

Naturalmente lo tin oportunidad pa inscribi como studiante p’e estudio pa maestro di Enseñansa Primario, Movecion y Salud, Bachelor Papiamento y Bachelor Hulandes.

Pa por inscribi na IPA mester trece e papel di registro civil (papel di AWG 5,-), si a gradua caba copia di diploma di sea HAVO, VWO of MBO nivel 4.

E gastonan di inscripcion ta AWG 75,-.

Banda di esaki tur persona cu ta interesa den Bachelor Ingles y Bachelor Spaño por pasa IPA pa ricibi informacion y yena un formulario di interes.

 

Tambe lo tin un ‘Food & Bake Sale’ organisa pa nos propio studiantenan.

E benta di cuminda aki tin como meta pa recauda fondo p’e studiantenan di aña 3 cu pronto lo biaha pa exterior pa nan pasantia internacional.

Di e manera aki IPA ta brinda henter Aruba un dia special di orientacion, yen di informacion y actividad.

Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website www.ipaaruba.com.

Leave a Reply

Top