Magda Tromp a gradua como Bachelor den Organization, Governance and Management

Dilanti di un comision di graduacion, studiante Magda Tromp a defende su investigacion pa obtene su titulo di Bachelor den Organization, Governance and Management. Esaki ta un programa academico cu Faculty of Arts & Sciences di Universidad di Aruba ta ofrece.  Magda Tromp t’e di 12 graduado di e programa di estudio aki.

E presentacion y defensa di e tesis a tuma lugar dilanti di e comision di graduacion cu a consisti di drs. Angelo Brete (supervisor di thesis), drs. Yolanda Richardson y Director suplemente di Brandweer, sr.Ponson, kende a representa e organisacion den cual e investigacion a wordo haci.

 

Magda Tromp ta traha na Departamento di Finanza y el a a scoge pa haci su investigacion riba e tema con por garantisa e nivel di produccion na Brandweer aunke cu e edad di pensioen a subi, sin gastonan adicional riba tereno di personal.

Magda Tromp su tesis tabata uno sensitivo y cu yen di reto. Magda a indica cu e edad di pensioen a subi den loke ta mustra den e documentonan cu el a studia, por medio di un acuerdo seya entre sindicatonan, cu ta representa e trahador, y Gobierno.

Pero segun e teoria y experiencia na Hulanda, e acuerdonan aki no a tene cuenta cu e necesidad di e trahador cu tin un trabao cu ta fisicamente pisa y specialisa; E asina yama “bezwarende functie”.

 

P’e motibo aki Magda Tromp kier a studia con e implementacion di e acuerdo y decision aki lo por tin influencia riba e trabao cu e trahador ta desplega unabez cu e pasa e edad di 60 den e parti represivo di Brandweer.

Tambe Magda a studia kico t’e riesgonan pa  “bezwarende functies” pa trahadornan cu ya a cuminsa sinti e efectonan fisico di un edad avanza y particularmente p’esnan cu ya a cumpli 45.

Magda a haci investigacion di e documentonan existente na Departamento di Brandweer, e teoria y experiencia na Hulanda den e area di “bezwarende functies” y el a diseña un cuestionario cu el a suministra bou di e empleadonan di Brandweer.

 

E obhetivo tabata pa wak p.e. si e trahadornan ta sinti e consecuencianan di nan edad ora di ehecuta nan trabao (cu ta un bezwarende functie).

Otro resultadonan cu el a colecciona ta tin di haber cu e deseo di cambia di funcion o mobilisa den Departamento di Brandweer mes como strategia pa atende cu e proceso di “veroudering” bou di e trahadornan di Brandweer.

Un di e resultado di e investigacion ta mustra cu e edad di e trahador ta dificulta su abilidad pa traha como bombero y cu lo mester traha riba un maneho riba e tereno aki pa garantisa e produccion y calidad di trabao specialisa y pisa di un bombero.

 

Magda Tromp a despleha hopi curashi y perserverancia y despues cu el a defende su tesis  decano drs. Tim Croes a haci entrega di e diploma den presencia di su yiu, famia, amigo y conocirnan.

Comunidad di Universidad di Aruba, particularmente Departamento di ‘Organization, Governance and Management’, ta felicita Magda Tromp cu e logro aki y ta manda desonan di hopi exito pa su carera profesional.

 

Pa mas informacion riba e estudio OGM, bishita e website di Universidad di Aruba na http://www.ua.aw/OGM

 

 

Top