Maneho di reconexion di awa pa clientenan cu no a paga nan cuenta ta mal pensá y iresponsabel

E instruccion di Gabinete interino Pisas na Aqualectra pa reconectá e bibiendanan di cual a sera nan cuenta inmediatamente bèk riba e red di awa, sin cu ta conocí ken ta bay paga p’e cuentanan

di awa atrasá aki ta, na opinion di Asociacion di Comèrcio y Industria di Còrsou (VBC), un acto mal pensá y altamente iresponsabel.

 

Na humilde opinion di VBC, a lanta empresanan di Gobièrno specialmente pa evitá metemento di Gobièrno cu e operacion diario di e empresanan aki.

Ta fundamentalmente robes si un Gobièrno kier hiba y realisá un maneho social/anti-pobresa via di e entidadnan gubernamental aki.

 

For di e rapòrt di encuesta civil di prof. mr. Willems ta resultá claramente kico t’e consecuencianan ora cu mandatarionan político, bou di e pretexto di representacion di accionista, bay sinta riba stul di directiva di e empresanan di Gobièrno aki.

Bahamento di tarifa di coriente di e tempo aya, sin cu tabatin motibo p’esaki y transferencia di accionnan “por nada”, a pone cu Aqualektra a bay para na rand di bancarota.

 

Despues di esey comunidad mester a paga caro pa evitá cu un ke otro lo a sosode. Awor Gabinete interino Pisas ta duna un “intruccion (aanwijzing)” pa reconectá e clientenan cu a còrta nan awa bèk riba e red di tuberia di awa.

Ta parce cu storia ta bay ripití su mes y claramente ta keda demostrá cu tin algun mandatario político cu no kièr siña di lèsnan di pasado.

 

Aqualectra no ta un instituto filantrópico, sino un empresa cu mester pèrcurá pa producí y entregá awa y coriente na comunidad den un forma mas eficiente posibel contra e mihor prijs y calidad.

Entrega y garantisando e prevision básico aki ta di un importancia crucial pa desaroyo y crecemento social/económico duradero.

Esaki ta conta tambe pa nos pocision di competenciaa y clima di inversion. Pa garantisá esaki un bon maneho financiero ta sumamente necesario.

Ta di spera cu Minister Finasa lo sirbi como vigilador di finansa publico.

 

E instrumento “desconectá cliente for di red di awa y coriente” ta un parti esencial di e pakete financiero operacional di directiva di Aqualectra y ta un medio importante pa por operá y actua obhetivamente.

No ta deseabel cu mandatarionan politico como representante di accionista bay mete nan mes directamente cu e asunto aki p’e no resultá den dunamento di previlegio di un pa otro y na cada ken su antoho.

Pa hiba un maneho social/anti-pobresa lo por considerá pa introducí un maneho di subsidio obhetivo pa clientenan den e categoria di min- en onvermogend berdadero, segun VBC.

Top