Manera nos di AWEMainta a bin ta demanda, inspectornan Hulandes lo bin chèck si ta safe pa bula cu avionnan di InselAir

W’STAD/O’STAD – Gobierno Hulandes a aceptá invitacion pa su expertonan bin haci investigacion di seguridad di InselAir

Secretario di Estado di Ministerio di Infrastructura y Medio Ambiente (I&M) di Hulanda, sra. Sharon Dijksma, a aceptá e invitacion pa laga su expertonan di Inspectie Leefomgeving en Transport (ILT) bin Còrsou y confirma nan mes di seguridad di InselAir su companianan na Còrsou y tambe na Aruba.

 

Nos di AWEMainta a bin ta bisa esaki, mas ainda ora cu t’e propio KLM a dicidi di bende su avionnan bieu cu InselAir, e.o. algun di su jetnan Fokker.

E decision aki a cay despues cu Minister Suzy Camelia a ofrecé Gobièrno Hulandes pa nan expertonan bin Còrsou y haci un investigacion di e situacion di seguridad n’e compania di aviacion.

 

Esaki ta den cuadro di e decision cu Gobièrno Hulandes a tuma pa no laga su ámbtenarnan bula cu buelonan di InselAir.

Autoridad di Aviacion Civil di Còrsou lo duna e Hulandesnan tur cooperacion necesario durante di nan investigacion pa garantisá Gobièrno Hulandes cu ta safe pa bula cu avionnan di InselAir.

 

Loke nos ta haya masha straño t’e silencio di parti di Gobierno di Aruba, unda Minister di Turismo, di Transporte no a duna ni un comentario ainda riba e caso di InselAir, siendo cu ta Departamento di Aviacion Civil di Aruba a ground tur e avionnan MD di InselAir Aruba.

Pakico Gobierno di Aruba no a duna su opinion ainda, nan tin cu bin splica e siman aki.

Loke si nos sa, cu siman pasa funcionarionan di Departamento di Aviacion Civil tabata na Corsou y tabata den reunion cu nan colega na Corsou.

Nos a trata di haya e Director di Aviacion Civil di Aruba, pero sin resultado, maske cu nos a laga nos number di telefon pa tuma contacto cu nos.

 

 

Top