Manera ta di spera Ys c.s. a nombra Jardim presidente interino na CBCS

WILLEMSTAD – Awe mainta Hunta di Komisario na Banko Sentral di Korsou i Sint Maarten, a anunsiá ku nan a nombra dos direktor interino den direktiva di Banko Sentral.

Falta tres dia pa Chos Romero baha ku penshun i na ougustus e hunta di komisario a kuminsa selektá dos direktor pa okupá e vakaturanan.

E proseso a kuminsa te dia 2 di òktober pasobra mester a selektá seis kandidato, pa kada posishon tres kandidato.

Un pa direktor Sekretario i un pa direktor financiero-ekonomiko.

 

Pa regla nan mester a selektá i keda kla ku e kandidatonan promé ku 17 di november pero rumor ta kore ku nan no a keda kla ku screening di e kandidatonan pa direktor.

Pa evitá ku Banko Sentral lo a keda manera un barku a la deriva, e hunta di komisario a nombra señora Leila Matroos-Lasten i  José Jardim temporalmente komo direktornan di Banko Sentral di Korsou i Sint Maarten.

E periodo interino ta termina na momento ku Korsou i Sint Maarten konfirmá e kandidatonan.

 

Leila Matroos-Lasten su edat ta 43 aña i e ta akountent. Ela okupá diferente funshon komo direktor serka empresanan lokal (nan no a menshoná kua nan ta: red).

Entrante awe señora Matroos lo okupá den funshon komo direktor sekretario ku te puesto ku Jerry Hasselmeyer tabata okupá.

Jardim tin 44 aña i ta ekonomista i un tempu e tabata direktor di sektor na Ministerio di Finansa pero no komo direktor general.

Di momento ku Chos Romero baha ku penshun, Jardim lo asumi e puesto vakante di direktor finansiero ekonomiko ku te puesto ofisial di Chos Romero.

 

Por sierto ku ta interesante sigi e karera di Jardim ultimo 6 aña kaminda ela hasi poko ‘bokkesprongen’ spektakular.

Su promé ‘bokkesprong’ tabata tempu ku e hoy dia fugitivo di hustisia Jorge Jamaloodin a bira minister di Finansa pero tabata mas den sentronan di dibertishon ku  na trabou.

I ora e tabata na trabou, e tabata terorisá Jardim hasta tal grado ku Jardim a kore bai buska trabou na Banko Sentral serka Emsley Tromp.

Ela haña nombramentu serka Emsley Tromp pero nunka a presentá pa traha pasobra den tur e krisisnan di gobiernu ku tabatin, ela mira oportunidat pa promové vertiginosamente i bira minister.

 

Sinembargo dado momento despues ku e no tabata minister mas, ela retorná Ministerio di Finansa manera ‘Pedro por su casa’ i dado momento a tuma retiro komo ámtenar reportadamente ku un garantia ku e por retorná lokual a sosodé despues di seis luna.

Den e periodo ei ela lanta un kompania ku tabata ofresé su servisionan ne kompania di akountent Bearing Point serka kual koinsidentalmente gobiernu a kumpra un programa di kòmpiuter pa mas ku 20 mion dòler i ku un kontrat di servisio di varios mion pa aña.

Mester bisa ku ela pone su piesanan di ahedres kaminda nan a rindi mas i ku praktikamente e por konsiderá su mes e gran hefe nobo di Banko Sentral.

 

Leave a Reply

Top