Manifestacion multi-racial grandioso pa rechasá cancelacion di eleccion

WILLEMSTAD – Curazon di Marchena diamars atardi tabata duna inspiracion pa haña optimismo atrobe cu na Corsou mester por bin cambio pa transformá e ambiente mugre cu ta reina despues cu e mayoria artificial di e coalicion ‘tutti frutti’ asumi mando den Fòrti.

E manifestacion cu a tuma lugar diamars den e bario di Marchena tabata simplemente glorioso y grandioso.

 

Cualkier otro calificacion lo no haci honor ne suseso aunke tabatin un hechador di baina cu tabata cana papia duro y manfiestá cu un bandera di infierno cu ta simbolo di esnan cu a mandé bin daña ambiente.

E promé orador tabata Steven Martina, e líder politico number 2 di partido MAN, kende a haci un apelacion riba e manifestantenan pa keda hunto y para pa nos derechonan, pasobra nos democracia ta na peliger.

Martina a splica cu nos mester logra un Corsou cu trankilidad y stabilidat mester tin respèt pa regla y leynan.

 

Si nos observá e Gobierno interino por a mira desobediencia y falta di respèt.

Corsou no por progresa sin respèt y disciplina cumpliendo cu nos debernan.

Nos mester lucha pa un comunidad cu kier progresa mester respetá institutonan cu bo mes a crea y si Gobernador firma un decreto, esey ta un ley y si poné un banda e ta falta di respèt.

 

Steven Martina a anuncia cu e intento pa aboli e ley a fracasá y cu dia 28 ta tene eleccion.

Alabes nos mester pensa padilanti y tene cuenta cu e pasonan cu e coalicion nobo por bin cune pa nos por neutralisá efecto negativo riba e fecha di eleccion.

Promé cu mester pone cana ta eleccion, pasobra kico por tin contra eleccion caminda e pueblo por haci uso di su derecho di voto.

 

Rhuggenaath na su turno a enfatisá cu tin cu sali na defensa di nos democracia y mester tumé na serio, pasobra e Gobierno supuesamente di pueblo a tuma decision ilegal y pone ley y democracia un banda. Tur esey pa nan keda na poder loke no ta di nos pais.

Loke tabatin diamars atardi te promé paso y por mira cu nan ta hibando politica pa sirbi nan propio interes y nan saco.

Un politica pa sirbi nan amigonan y crimen organisá. P’esey nos mester tuma e cos aki na serio.

 

A mira hendenan cu a bay fo’i partido a bende nan asiento cu otronan.

Esaki no ta un mayoria y p’esey mes pasobra nan no tin mayoria nan tin miedo di eleccion y p’esey nan ta destrui bòrchi, nan kier intimidá y masacra e minoria temporal.

Rhuggenaath a pidi tur hende pa sali pa bo color, pero ban vota awor!

Rhuggenaath tin preocupacion cu ta propositonan individualista ta hibando nos un rumbo descabeyá. Nan ta parti cos pa cumpra bo voto.

Nan ta parti cos pa adopta nos presupuesto y tuma nos companianan di pueblo y esey a pasa na 2010 y 2012 ora sèn a disparcé den companianan y pa nombra nan amigonan di baho mundo den Banco Central.

Awor ta buscando otro confrontacion pa destrui nos institutonnan y confrontacion cu Gobernador y Reino Hulandes. Pasobra nan kier pa nos ta contra Hulanda.

 

Tin masha ehempel di paisnan cu ta trapa democracia y promé cu bo sa nan ta tuma tur poder y tin dictadura. Esey nos no por kier sino democracia.

Pueblo no kier mas tension y mester papia di crea trabou y eleccion secreto.

Manera e manifestacion tabata nos mester por pa restaurá democracia y restaura nos bida aki na Corsou.

Otro persona cu a papia tabata Hensley Koeiman, kende a reconocé cu e por a cometé eror, pero corupcion, nunca!

Top