Maria Santa Cruz y Wendy Maduro Johnson a inspira esnan presente na Conferencia di Dia Internacional di Hende Muher

 

Dia 8 di maart ultimo, Renaissance Convention Center tabata yena te rand cu 800 hende muher presente pa scucha oradornan internacional y local riba diferente topico concerniente hende muher. Pero poco por a realisa cu nan tabata bay presencia un dia yena cu storianan di inspiracion cu mensahenan emocional di storianan personal.

 

Maria Santa Cruz ta un di e storianan aki cu sigur a inspira un y tur con pa surpasa obstaculonan pa yega na bo metanan.

Maria Santa Cruz originalmente di Peru ta bisa cu na comienso e tabata hopi nervioso pa motibo cu ta prome biaha cu e ta haci algo asina.

“Mi presentacion tabata riba mi mes. Mi experiencia den mi estudio dor di cu mi no ta di Aruba.

Ora bo ta di afo e idioma ta bira mas dificil. Esaki a haci cu mi mester a cuminsa di abao.

 

Prome EPB y asina mi a sigui crece y a bay tras di mi metanan te cu mi a yega na haya mi diploma di Universidad di Aruba cu mi Bachelor di Accounting.”

“Mi a papia di e obstaculonan cu mi mester a confronta. Obstaculonan manera cu hende no por kere cu un Latino por sobresali akinan.

Mi tabata haya comentarionan di mi coleganan studiante na EPB cu mi lo no por bay hopi leu y mi mensahe awe tabata cu realmente SI bo por.

No ta depende ki scol bo a bay. E ta depende di cada persona cu ta bay tras di su metanan,” e ta splica.

 

Assistent Administrativo Wendy Maduro Johnson a presenta un storia personal hopi fuerte unda tur esnan presente a keda cautiva pa su experiencia cu abuso di mucha como tambe violencia domestico.

“Mi a presenta mi storia personal unda cu mi a papia di mi niñez cu abuso y violencia domestico.

Mi a splica con mi a uza mi experiencianan personal y comberti nan den accionnan afirmativo contra violencia domestico y bira un bos pa otro sobrevivientenan y asina yuda nan tambe pa habri nan boca y conta nan storia y haci un diferencia,” e ta bisa firmemente.

 

“Mi conseho pa comunidad ta ora di trata cu victima of sobrevivientenan di cualkier forma di abuso pa tin pasenshi cu nan. Hopi biaha den casonan di violencia domestico nos ta tende hopi critica riba e victima. Pakico bo no ta bay lage?

Pakico bo ta keda bay bek serca dje? Tin hopi tiramento di culpa den e preguntanan aki.

Loke nos ta haciendo ora cu nos forma e preguntanan aki di tal manera ta pone tur e responsabilidad di e situacion riba e sobrevivientenan.

Mientras cu nos mester ta un comunidad cu no ta permiti violencia domestico como tambe nos mester ta un comunidad cu lo yuda e muhernan aki.

 

Hendenan cu ta experiencia violencia domestico mester por sinti cu nan por bay laga un situacion peligroso,” e ta agrega.

Wendy ta sigui bisa cu hopi biaha muher ta bolbe bek. Hende ta bolbe bek, pasobra nan ta sinti cu no tin manera di sali. Nan ta sinti cu no tin caminda pa bay.

“Si nos ta un comunidad cu ta tuma riba su mes pa bisa cu e ta nos responsabilidad tambe p’asina nan por haya un caminda pa bay.

Un caminda sigur unda cu nan ta sinti cu tin un net di siguridad.

“Nos lo mira mas muher mas fuerte y confia cu nan por bay laga un situacion peligroso.”

 

 

Top