Marisol Lopez-Tromp di Partido POR: Cu Ministernan ta perde tur caso den corte ta un muestra di falta di maneho y coordinacion

Como un ehempel pa duna un bista rib’e falta di maneho y coordinacion cu tin den Gobierno, entre nos Ministernan, drs. Marisol Lopez a splica den conferencia di prensa di POR, lo siguiente:

Un Minister di un departamento, sea cu e ta departamento social, departamento di husticia, por ta infrastructura, por ta tur di nan…trabou, etc., e mester por pone riba papel y tambe ta cla pa e directornan di su departamentonan sea hunto cu nan of mas trempan, kico ta e prioridadnan cu e tin, y con e procedura cu e tin pa atende cu esakinan ta.
“Na momento cu bo no tin nada fiha riba papel y nos parlamento di aruba tampoco a ricibi di bo como gobernante, ni un papel of un nota cu bo por bisa, algun blachi cu ta splica por escrito kico ta bo maneho y kico ta bo pensamento, con pa atende cu e cartera cu bo tin, kico ta bo prioridad, con bo ta bay ehecuta, kico ta e reglanan den bo departamento, no solamente ley pero proceduranan, con pa anda cu peticionnan p. e. si uno hopi importante, si bo no tin esey fiha bo ta bay haya un free for all, cual na e momentonan aki ta sosodiendo den varios cartera”, Marisol Lopez-Tromp a bisa.

 

Esnan cu no mester tin e poder pa atende cu e topiconan aki ta haya poder pa atende esaki, nan ta tuma e poder pa hacie, y bo ta haya cu tin hasta ambtenaarnan of departamentonan ta wordo hala un banda y decisionnan ta tuma luga sin cu el a cana e ruta of e procedura legal manera mester ta.

 

“Esaki ta hopi importante pasobra awendia nos ta wak cu ta wordo acusa na diferente gobernante, y cu rason cu tin cierto conflicto den nan carteranan. Conflicto entre Ministernan tambe, pakico un ta bisa A e otro bin cu B, pakico un a propaga A e otro a ehecuta C?

Pasobra no tin coordinacion na prome lugar y na di dos lugar, nos Minister Presidente cu mester atende of coregi esaki ta mas ausente cu e ta presente. Cu esaki mi kiermen di cu ora cu tin topiconan grandi den bo pais cu merece no solamente un splicacion di e Minister concerni pero di Minister Presidente e no t’ey.

No solamente fisicamente e no t’ey, pero e no t’ey tampoco pa duna ningun splicacion pakico e asunto ta asina y kico e ta bay haci cu ne pa remedie”, sra. Lopez tromp a trece dilanti.

El a comenta tambe cu no tin nada di malo si bo coregi un eror na e momento cu wordo haci of bo mehora y drecha un procedura, si bo sinta hunto cu bo Ministernan y bisa cu bo a yega na tal cambio.

 

“Es mas, den esey bo por mustra bo grandesa y esey ta algo cu pueblo merece. Pero kico ta sosode? En realidad ta wordo haci comosifuera cu tur cos ta bon, y e pueblo ta cana pidiendo pa claridad riba diferente procedura cu tin den comunidad, es mas a yega di bay asina leu cu diferente Minister ta trapa nos propio leynan te cu nan ta wordo hiba corte y nan ta perde nan caso como gobernante”, sra. Tromp a menciona.

 

Ministernan ta esnan cu mester cuida nos leynan pa wordo ehecuta como tal. Pero nan ta perde nan caso pasobra nan no ta atene nan mes na e mesun leynan cu nan tin cu cuida. Esey caba ta mustrabo un total falta di maneho y un total falta di coordinacion.

Top