Marisol Lopez Tromp di POR: Educacion y enseñansa ta algo cu ta biba tur dia den comunidad

Den rueda di prensa di Partido POR, Plataforma Forsa Nobo, Marisol Lopez-Tromp a cuminsa papiando rib’e tema di educacion y enseñansa. Mesun tema trata como central tambe pa Joslin Croes y Robin Ann Didder.

Lopez- Tromp a splica cu educacion y enseñansa ta algo cu ta biba tur dia den comunidad, no solamente dor di mayornan cu tin nan yiunan na scol, pero tambe ta tema di e maestronan e. o. pasobra simplemente e ta un topico asina cardinal cu ta pasa dor di tur Ministerio.

 

Marisol Lopez-Tromp a acentua: “E no ta algo para riba su mes. E ta algo esencial pa gobernacion y ta hunga un rol den tur cartera di cada Minister”, drs. Lopez-Tromp a subraya.

E dama a sigui splica cu esaki ta e motibo pa cual diez aña pasa, a nace e iniciativa pa bin cu un Plan Nacional di Enseñansa, cual a bira realidad dor di un participacion di esnan cu ta traha den veld, no solamente di enseñansa, pero tur gremio local a participa den e plan aki, pa yega asina na un vision pa pais Aruba den e proximo diez añanan.

El a splica cu esaki ta un proceso caminda cu no solamente den veld di enseñansa, pero e gremionan sindical, clero, tambe diferente fundacion manera social, turismo, husticia, tur di nan a participa conhuntamente pa Aruba conoce su prome plan nacional di educacion.

 

Drs. Lopez-Tromp a señala cu esaki ta un plan cu a percura pa Aruba haya fondonan di Union Europeo, caminda cu esaki tabata un condicion pa nos pais haya placa pa por a continua cu su plan nacional.

“Esaki ta nifica cu te awe, fondonan cu ta bin di Union Europeo, pa educacion, ta danki na e vision di e Plan Nacional di Enseñansa cu te awe ta drentando fondonan pa gobernacion actual pa cierto metanan den enseñansa. Realidad ta si, cu gran parti di e plan aki no a keda completamente ehecuta. Ta asina cu diferente area den dj’e no solamente ta costa cen, pero e mandatario en cuestion, mester tine como un prioridad pa ehecuta esaki.

Y akinan ta caminda cu mi ta kere cu mirando e periodo nos dilanti y sigur pa e plataforma aki nos ta considera educacion asina importante, cu mi ta kere cu, cu apoyo di pueblo den gobernacion e ta un aspecto cu mester sigui wordo implementa caminda cu mester adapta y sigur pa continua cu un vision comun y sosten di tur esnan den comunidad pa conoce educacion aki na Aruba”, Lopez-Tromp a bisa.

 

Como un punto tambe importante el a menciona cu den e plan aki tambe a participa no solamente e parti di scolnan publico cu ta cay bao di Gobierno, pero tambe e diferente otro stichtingnan di enseñansa, cu otro scolnan ta cay bao di nan manera SKOA (scol Catolico), SPCOA (scol Protestante), y tur otro directiva y scol cu no ta cay necesariamente bao Gobierno, cu a haci un participacion completo ademas di e maestronan. P’esey mes mi kier subraya e importancia di tin un vision comun como pais, pasobra esey ta cardinal, pa bo por ehecuta un vision carga pa un y tur”, Lopez -Tromp a menciona.

Top