Marisol Lopez-Tromp: Pa añanan ta discuti riba nos capacidad di carga pero gobierno no ta defini ni planifica esey!

 

Marisol Lopez-Tromp a sigui splica den rueda di prensa, cu maneho y coordinacion di nos gobernantenan ta mustra unda nos kier bay cu Aruba.

Esaki ta un pregunta cu a wordo y ta discuti riba dj’e pa añas caba: “Nos capacidad di carga, pero Gobierno no ta fiha kico e kier manera hopi otro pais si ta haci. Y na momento bo fih’e bo ta planifik’e. Si no tine fiha no tin planificacion”, drs. Lopez Tromp a observa.

 

Un ehempel chikito ta bay den tempo atras, hopi aña pasa tempo cu Gobierno a cambia, el a entrega dos mapa na Minister pa sigui cu proyectonan grandi pa Aruba. Un tabata e mapa di nos centro di cuido na San Nicolas pa nos ancianonan y nos handicapnan. E tabata importante pa e proyecto sigui pa e caba na bienestar di nos grandinan y nos handicapnan. Esey a wordo entrega na sra. Hooyboer-Winklaar. Otro mapanan ta di nos scol ba bin cu un scol basico nobo.

 

“Pa busca un lugar pa e scol aki pasobra placa tabatin p’e, pa wordo ehecuta den e añanan nos dilanti. Un proyecto necesario pa nos muchanan aki na Aruba mirando con grandi nos klasnan ta actualmente”, drs. Lopez-Tromp a indica.

El a sigui bisa cu e proyecto di centro pa nos grandinan a keda ehecuta y esun di scol nunca a bin, pasobra e placa a bay pa otro destinacion, Gobierno a dicidi pa otro prioridad na e momento ey y a dicidi destin’e pa Caya Grandi cu tambe ta un proyecto cu a dura hopi aña.

“E esencia cu mi kier bisa ta cu si bo no ta traha planifica, bo no tin un maneho, ningun hende sa unda bo kier bay. Anto bo ta yega planta riba bo ciudadanonan decisionnan tin biaha tuma ad hoc anto pensando cu esaki lo bay salba bo periodo te cu eleccion”, drs. Lopez-Tromp a bisa.

 

Ademas, el a splica cu si ta tuma decisionnan duradero no mester tin miedo.

“Bo ta bin cu nan Parlamento, bo ta discuti nan habri pasobra tin proyectonan cu ta bay dura añas y añas despues hasta ora cu bo no t’ey mas, 20 of 30 aña despues, kisas nos yiunan ta bay ta gobernando e tempo ey y finalisando, trahando of tene nan bezig cu e proyectonan y plannan aki.

Importante ta pa trece padilanti pues, cu claro cu nos tin tur e problemanan cu nos tin aworaki a cuminsa den e cas di gobernacion aki mes dor di no fiha prioridad, no fiha un maneho coherente entre e Ministernan, laga cada ken haciendo su mescos y ora ta conflictivo ta bin problema y Minister Presidente ausente cu no ta percura pa coordinacion di su mesun Gobierno”, drs. Marisol Lopez Tromp a comenta.

Top