Marisol Lopez Tromp: POR lo pusha pa reunion publico bin y aproba ley Ombudsman

Den rueda di prensa di Partido POR, Plataforma Forsa Nobo, e candidato sra. Marisol Tromp a elabora rib’e topico di Ombudsman y Kinder Ombudsman, cu ta un proyecto cu a wordo discuti pa varios aña caba, pero ainda no ta un realidad.

 

Marisol a trece dilanti cu esaki ta un topico cu pa hopi aña segun como casi 20 aña caba, caminda cu Gobierno a bin Gobierno a bay, tur a bisa cu Aruba mester di un ombudsman.

“Tres aña pasa, ora mi a bira Presidente di Parlamento, conhuntamente cu tur fraccion, nos a instala un comision special p’asina e tres fraccionnan traha rib’e ley y cu sosten di tur e ley a keda traha”, Lopez- Tromp a declara.

 

E fraccionnan a keda reuni hopi tocante kico ta posible pa Aruba, con pa hacie, etc., hasta cu e ley a keda cla pa bay un reunion publico y tambe ta asina cu esaki a bin cu hopi mas enfasis.

Marisol a bisa cu desde cu durante e reunionnan interparlamentario na Hulanda a bin e rapport di UNICEF cu a papia riba e derechonan di nos muchanan di e region Caribense na unda Aruba tambe a wordo evalua, mescos cu Corsou y e otro islanan, y a bisa cu ta primordial pa Aruba y e otro paisnan di Reino conoce no solamente Ombudsman pero un Kinder Ombudsman tambe.

 

Defensor di “Corsou tine pa diez aña caba, Sint Maarten tin di dj’e, y na Hulanda tin un cantidad den diferente region, pero Aruba ainda falta. Y nos meta ta pa pusha pa e bira un realidad.

Un bez cu e ley pasa si e Presidente di Staten na e momentonan aki dicidi di yama un reunion publico y esaki sosode, e siguiente paso ta cu mester wordo elegi e Ombudsman y e Kinder Ombudsman tambe”, Marisol Lopez-Tromp a splica.

 

A enfatisa cu Ombudsman no ta un hende cu gobierno ta bay nombra. Gobierno no tin un dede den esaki.

“E ta algo cu segun ley Parlamento di Aruba ta haya un proposicion di tres instancia imparcial: Den e caso aki e voorzitter di Reken Kamer, e voorzitter di Raad van Advies y e Corte Comun di Husticia. Nan tres lo presenta e candidatonan segun e proposicion di ley aworaki”, el a bisa.

 

Lopez- Tromp a conclui bisando cu si e proposicion di ley wordo aproba e tres instancianan menciona lo presenta e tres candidatonan cu segun nan por carga e funcion aki y e ora ey ta Parlamento ta dicidi esaki y vota pa e candidato of candidatanan cu ta cumpli cu e rekisitonan y por haci e trabao aki na un forma autonomo y imparcial pa nos pais.

Leave a Reply

Top