Marisol Lopez-Tromp: Tin hopi reclamo den pueblo pasobra no tin coordinacion entre e Ministernan

Sra. drs. Marisol Lopez-Tromp, miembro di Partido POR, Plataforma Forza Nobo, a hiba palabra den conferencia semanal di prensa.

Pa cuminza, el a elabora riba e preguntanan: Pakico tin asina tanto problema aworaki den comunidad, cu pueblo ta reclama nos gobernantenan riba dje y nos Parlamento tambe?

 

Oposicion ta haci preguntanan riba dje, kizas no tur ora ta haya contesta. Pakico nos comunidad ta reclama pa cierto atencion di nos gobernantenan y no ta ricibi esaki?

Un di e problemanan mas grandi ta cu tin falta di coordinacion y no tin maneho entre e diferente gobernantenan.

Lopez-Tromp a bisa cu kizas pa prensa no ta algo nobo pa tende esaki, pero el a bay riba dje pasobra ta sumamente importante aclarea e motibonan pakico e problemanan ta manera nan ta awor.

 

El menciona cu na prome esaki ta den man di Prome Minister di nos pais. “Su tarea ta pa no solamente bo por bisa tene su Gabinete hunto, pero tambe pa coordina entre su diferente Ministernan, no solamente riba proyectonan, pero tambe riba e maneho cu mester tin”, segun sra. Lopez-Tromp.

El a bisa cu problema ta bin ora cu riba diferente topico cu pueblo kier claridad riba dje y no ta ricibi esaki, pueblo ta confundi, of pueblo ta busca su derecho y no ta haye, pueblo kier tin informacion riba un cierto topico di un departamento por ehemplo, y si e ta bruha riba e topico aki y no tin claridad, ta pasobra e Minister concerni no a fiha un maneho cla kico t’e reglanan, kico ta e pensamentonan, pakico e ta gobernando manera e ta gobernando.

Top