Maritiem Politie a rescata boto cu un persona bolbiendo cu fuel for di Venezuela

Diamars atardi pa 3’or Maritiem Politie a haya melding di un boto local cu tabata den problema pa zuid di Aruba. Den e melding a bisa cu tabatin dos persona na bordo, y e boto tabata serca di e boortorennan.

 

Inmediatamente e boto BP-2 di Maritiem Politie a sali pa busca e boto. A mantene contacto cu e boto pa medio di un telefon di e persona den e boto, pero a perde contacto ora cu nan tabata na caminda p’e area, y a tarda un poco pa Polis haya e boto.

Finalmente Maritiem Politie a haya e boto banda di e tres boortorennan, mas of menos 7 miya zuid di Barcadera.

Tabatin solamente un persona na bordo di e boto, registracion A-2298, cu e nomber “K-ACHI-K-MA”.

 

Maritiem Politie a tou e boto pa Barcadera den un accion di rescata cu a dura dos ora y mey,

E persona cu tabata na bordo di e boto a declara na Polis cu el a bay busca fuel na Venezuela y a haya problema cu e motor di su boto.

Maritiem Politie ta recorda tur persona cu ta bay subi lama cu boto pa percura pa nan boto ta na ordo y e documentonan di e boto ta na ordo.

 

Particularmente den temporada di Cuaresma, cu tin hopi biento y lama bruto, ta sumamente importante pa tur rekisito ta na ordo, pero mas cu tur cos ta esencial pa tecnicamente e boto su motor, e sistema di comunicacion y tur otro medida di seguridad ta den bon condicion.

Regularmente personanan cu ta bay busca fuel cu boto na Venezuela mester wordo rescata ora nan haya na mes den problema como cu nan no ta tene cuenta cu nan mesun seguridad, y asina ta hinca bida di polis y Kustwacht tambe den peliger ora di sali pa yuda nan.

 

Maritiem Politie ta pidi un biaha mas pa atencion p’e situacion aki, y ta recorda tur doño di boto y otro persona cu ta uza boto fia pa busca fuel na Venezuela pa percura pa nan mesun proteccion y seguridad prome cu tur cos.

 

Top