Maske tin masha interes p’e localidad, Conseho di Minister a dicidi cu localidad di Bushiri lo bira un beach publico cu tur su facilidadnan

Ayera Conseho di Minister a tuma decision, despues di analisa un raport traha pa su expertonan, cu e tereno unda tin Bushiri Beach Hotel, cu lo basha e edificio aki abao y lo bira un tereno publico, cu su playa, cu tur facilidad necesario.

Maske cu tin masha grupo interesa pa haya e localidad aki pa desaroya sea un hotel of pa cualkier otro proyecto, pero si tuma na cuenta cu ya pueblo no tin un beach publico, ayera Conseho di Minister a dicidi pa basha Bushiri Beach Hotel abao, y construi un beach cu tur su facilidadnan.

 

Di acuerdo cu Prome Minister Mike Eman, ayera tabata un dia sumamente importante, pasobra Gobierno a haya e raport final di un comision cu a keda institui pa duna un conseho kico pa haci cu e localidad di Bushiri Beach Hotel, maske cu Parlamento a tuma decision caba, cu lo no duna mas permiso pa hotel n’e sitio ey y lo lagu’e un beach publico.

Pesey e anuncio di ayera no tabata un noticia, pero mester a cumpli cu mocion aproba den Parlamento.

 

Pero asina mes, Prome Minister Mike Eman a anuncia cu e decision di ayera tabata uno basta dificil, pasobra e.o. APFA, a haci un oferta pa cumpra e area ey pa basta miyon, cu e posibilidad pa bay desaroya den un hotel of condominium, pero Gobierno ta sinti cu pueblo no tin un beach publico mas.

P.e. e ultimo beach publico cu tabatin, a ser otorga dor di Gobierno anterior na The Ritz Carlton, nada contra di e cadena hotelero aki, pasobra e ta un contribucion pa turismo di Aruba, pero a lamenta cu asina Aruba a perde e ultimo parti di su beach publico.

 

Pesey e decision di ayera den Conseho di Minister, ta haci Prome Minister Mike Eman hopi contento, pasobra lo bay destina e area di Bushiri Beach Hotel pa un beach publico. Algo cu tin na Arashi, unda lo baha e edificio mahos aki abao, crea un beach publico cu tur su facilidadnan. Lo crea un arena multi-funcional pa diferente deporte banda di beach.

Pesey Mike Eman ta contento di por yuda pa duna pueblo un beach publico, cumpliendo asina cu e mocion di Parlamento.

 

 

Top