Mayoria alumno a indica cu lo prefera haya les na Papiamento; Segun Otmar Oduber

 

MGM source a conduci un encuesta cerca maestronan y studiantenan di Aruba.

Preguntanan ricibi a wordo screened, edita y traduci den tres grupo cu a wordo encuesta: scol basico, scol secundario y maestronan for di cual a ricibi 389 surveys valido.

 

A base di e encuesta cu a wordo teni a resulta cu 59% di alumnonan ta biba na cas cu ambos mayor, 38% cu un mayor y 3% no ta biba cu nan mayor. 73% di alumnonan ta papia Papiamento na cas mientras cu 8% ta papia Hulandes, 6% Ingles, 11% Spaño, 1% Chines y 2% otro idioma, segun Otmar Oduber.

 

Pa loke ta e grado cu alumnonan ta gusta scol, 46% di alumnonan a indica cu nan ta gusta scol untiki, 35% a bisa si, 8% a bisa hopi y 11% a indica cu nan no ta gusta scol. 62% di muchanan ta indica cu nan ta compronde nan les casi semper, 11% tin ora, 25% semper y 2% nunca.

58% di alumnonan ta bisa cu nan ta haya nan les bon, 16% ta haya esaki facil, 16% dificil y 8% hopi facil y 2% hopi dificil. Ora cu a puntra e alumnonan kico nan gusta mas di haya les, algo cu sigur no a sorpresa hopi maestro ta e hecho cu nan gusta traha den grupo 48%.

24% cu computer, 16% ta gusta haya les e manera tradicional unda cu maestro ta presenta e les na borchi, 8% haci presentacion y 4% otro. Mayoria alumnonan (48%) ta prefera haya les na Papiamento, sr. Oduber ta splica.

 

Otro resultadonan cu a resalta ta cu 68% di alumnonan a bisa cu nan nunca a experiencia bullying. E cantidad di alumnonan cu ta bay nan mesun cas despues di scol ta 78%, sinembargo, 37% di alumnonan ta haci deporte, lider di POR a agrega.

 

Hobennan entre 12 – 16

A acerca e grupo di alumnonan aki cu e preguntanan aki como cu a deduci cu alumnonan mas hoben no tabata na altura of no ta pone atencion na e cantidad di ora cu nan ta dedica na e ‘actividadnan’ aki.

 

A haci e pregunta na alumnonan, cuanto ora nan ta drumi pa dia, pa cual 38% a indica cu nan ta drumi entre 7-8 ora. 12% ta drumi menos cu 5ora pa dia, cual no ta saludabel pa un alumno su desaroyo y tampoco pa su prestacion na scol. Locual ta resalta tambe ta cu 40% di alumnonan ta wak Netflix, TV, social media, YouTube mas cu 5ora pa dia, sr. Oduber ta sigui splica.

 

Pa loke ta estudio despues di scol secundario mas cu 25 % di alumnonan no sa ainda kico nan ta bay haci ora cu nan caba scol, mientras cu mas cu 40% a indica cu nan kier bay studia afo for di cual 41% kier bay studia Hulanda.

 

E informacionnan aki ta saca for di e encuesta teni bou di maestronan y alumnonan y ta encera e parti cu a encuesta alumnonan. Den un proximo articulo lo presenta resultadonan di e preguntanan cu a wordo haci na maestronan, sr. Oduber a indica.

 

Plan di Accion POR

POR y miembronan lo ta evaluando tur resultado p’asina yega na e miho maneho pa loke ta enseñansa pa e proximo gobernacion, Otmar Oduber ta conclui.

Leave a Reply

Top