Mecanico acusa di inmoralidad riba dama cu a bin core stage

E homber M. di 39 aña y tata di 7 yiu a ofrece un stagiaire Hulandes pa yude drecha su auto cu a daña cune y awor e mester a presenta dilanti mesa berde pa actonan di inmoralidad, cual e ta nenga di a comete.
Ta trata di un hecho cu a tuma lugar na februari ultimo.

Segun e datonan den e procesverbaal e acusado a topa cu un dama Hulandes coriendo stage na Aruba cu a haya problema cu su auto. El a ofrece e mucha muher pa drecha e porta di auto p’e. Sinembargo el a bay cas di e hoben den oranan di anochi pa horta, segun e ta bisa.
El a bisa cu na momento cu el a drenta e cas den e scuridad, el a dal su dede n’e porta y a haci sonido.
El a drenta e kamber y a lock e porta. Su storia ta un poco confuso, ya cu e ta bisa el a bay pa horta, pero a bay den un kamber unda cu tin un otro persona drumi y a sigui p’e kamber di doño di e auto.
El a bisa di a lock e porta p’e por huy via di e bentana, ora cu e mucha muher a spierta y a cuminsa grita.

E victima ta bisa cu el a spierta ora cu el a sinti un hende drumi riba dje y e persona aki tabata sin carson, ya cu el a sinti e curpa masculino slap na su curpa y cu e homber a mishi cu su pechonan. Ora cu el a realisa kico ta pasando el a cuminsa grita y e homber a cuminsa choke.
E acusado a bisa prome cu el a tapa su boca p’e no grita, pero Huez a mustre cu e victima a keda cu marca na su garganta di e choca.
E ora el a admiti cu ta berdad el a wante na su garganta.

M. no por a huy tampoco via di bentana di e kamber, pasobra esaki tabatin trali. Mientras cu e victima tabata grita su compañera di cas pa yama Polis, el a core bay pafo. El a coy placa di un cartera y a laga e cartera atras.
E compañera di cas di e victima a declara cu dado momento el a sinti un hende habri e porta, pero a sigui drumi te ora cu el a tende e grito di su amiga pidiendo pa yama Polis.
El a bula lanta, haci e yamada y ora cu el a bay wak dor di e bentana, el a mira dos persona pafo.

Fiscal a repasa informacion di e procesverbaal cu ta bisa con e hecho a sosode segun e investigacion haci.
P’e representante di Ministerio Publico, e homber aki no bay pa horta. Un ladron ta coy loke cu e por y bandona e sitio mas liher posibel.
Den e caso aki, e tabata drumi riba e victima sin paña, ya cu e dama a sinti e penis slap contra dje. Ademas, el a lock e porta. Cual ladron ta pensa pa lock porta, mientras cu e ta busca cos di horta.

Apesar cu e ta un first offender pa Fiscal e caso aki ta uno sumamente serio, ya cu el a trata di comete e acto cu un muher cu tabata na soño. Un mucha muher cu a bin Aruba pa core stage.
Pa resto di su bida e lo keda cu un mal recuerdo di e isla aki pa culpa di e homber M.
Ademas, e hecho a tuma lugar den cas di e victima mes, unda e ta supone di ta sigur.
Pa tur e motibonan aki, el a pidi un castigo di 3 aña di cual 1 aña ta condicional y 3 aña di prueba.

Pa su abogado, e acusado no ta culpabel di e delito cu e ta wordo acusa di dje, pero mester a presente pa robo, ya cu e victima mes ta bisa cu e ta sinti falta di placa tambe. Tambe el a bisa cu su cliente ta bisti boxer y kisas dor cu esaki ta di un material fini e victima a sinti e curpa masculino ora cu el a tapa su boca p’e no grita pa ayudo.
Huez lo bay studia tur informacion y ta dicta sentencia di 10 di november awor.

Leave a Reply

Top