Mediador di Gobierno a calma e situacion tenso entre STA y gerencia di Arubus

Ora cu tin diferencia di opinion, semper ta bon p’e partidonan bay mesa y discuti e puntonan pa cual a surgi e diferencia.

Mediador di Gobierno, Anselmo Pontilius a logra di trece e partido na mesa, unda a cuminsa papia riba e protocol cu tin firma entre STA y Arubus.

E reunion aki a bay hopi bon, segun Teo Croes, gerente di Arubus, demostrando cu ta na mesa ta busca solucion.

 

Awor nan ta papia na un bon nivel y cu respet, unda a keda palabra cu lo sigui reuni, pa clarifica diferente punto, evitando iritacion inecesario, segun Teo Croes. Lo sigui cu training, p’asina con ta atende cu bus, con ta atende cu e pasaheronan rabia etc.

Diego de Cuba, Presidente di STA, a sinti cu Arubus no a cumpli cabalmente cu e protocol y mirando e situacion tenso, y asina a yega na un solucion, e.o. e asunto di salario.

 

A trata tambe e busnan cu ta den malestado, a sabiendas cu e situacion financiero di Arubus ta precario. Loke nifica cu mester bay hala e Minister responsabel aden, pa discuti esakinan.

Diego de Cuba ta haya cu STA a logra su meta, awor cu e partidonan a bin mesa, y clarifica tur punto di preocupacion cu tabatin.

 

Gerencia di Arubus a bay di acuerdo pa tur prome diahuebs, gerencia di Arubus y e shopstewardnan lo sigui reuni. A papia di e infrastructura cu Arubus mester tin, pasobra si tabatin un bon bushalte, sigur lo por a evita e accidente fatal di siman pasa, segun Diego de Cuba.

Ningun Gobierno no a percura pa tin un bon infrastructura pa busnan di Arubus ni p’e otro autobusnan. Aki si tur Gobierno a laga hopi di desea.

Top