Mensahe di Prome Minister Mike Eman na ciere di Aña Escolar 2016-2017: Pabien na tur graduado y studiante cu a bay over hunto cu nos compromiso pa sigui renoba y fortifica enseñansa

Diaranson merdia, Minister Presidente Mike Eman tabatin e placer di topa cu e hoben cu a resulta miho graduado di VWO Colegio Arubano.

E encuentro cu Roderick Tapia tabata e momento ideal p’e prome mandatario comparti su palabranan di pabien y reflexion: “Na tur cu ta haci esfuerso pa sigui un educacion y tur cu ta yuda, un palabra di danki awe. Pabien na tur graduado y na tur cu a bay over.

Ban celebra e vakantie grandi aki cu un gran aprecio pa loke nos sistema di enseñansa ta brinda nos y di nos parti, e compromiso importante pa sigui renob’e y fortifik’e. Studiante, mayor y educadornan… Danki y laga nos sigui riba e rumbo positivo aki.”

 

Prome Minister Eman tambe a dirigi palabra nan esnan cu lamentablemente no a alcansa un resultado positivo den e aña escolar cu awe ta culmina.

“Cada bes cu bo tin un momento asina, e ta duna bo e oportunidad pa reinforsa bo puntuacion y preparacion. E ta un momento cu por ta bo ta sinti’e como cu bo no a logra, pero hopi biaha pa esnan cu ta pasa dor di e periodo ey, ta experiencia un momento cu ta fortifica nan educacion pa e añanan cu nan tin nan dilanti.”

Un palabra di danki sincero ta bay tambe pa tur e profesionalnan den e sistema di educacion. Premier Eman ta bisa, “Continuamente e ta wordo guia y mehora dor di Directie Onderwijs y dor di e diferente institutonan cu Aruba tin pa enseñansa tanto publico como priva. Cada un di e institutonan aki ta duna un contribucion importante na e educacion di nos yiunan y na mehoracion di enseñansa.”

 

Entre e combersacionnan sosteni cu Tapia, e graduado a bisa cu un conseho cu e por duna otro hobennan ta pa “nunca give up, nunca laga un hende bisa bo cu bo no por y semper haci bo best. Dios ta keda importante den bida, keda cerca dje y E lo guia bo pasonan.”

Pa Premier Eman, e determinacion aki ta un cualidad importante den exito di cualkier studiante y tambe di cualkier persona den bida.

 

Cu esey e ta duna tambe nos e responsabiliad pa continua renoba e sistema di enseñansa, duna sosten na nos educadornan, na e studiantenan y na nos mayornan cu tin un rol importante den guia y forma nos hobennan den nan disciplina pa sigui nan scol n’e miho forma posibel y duna e hobennan tambe cada bes cu nan logra e palabra di reconocemento y p’esey mes awe a invita Roderick cu su mayornan pa duna nan e sentido di aprecio di Gobierno di oficina mas halto di gobernacion di Aruba un palabra di encurashamente pero tambe di aprecio y reconocemento pa un puntuacion asina special.

Top