MEP a gradici su ‘checkers’ cu a controla tur urna dia 22 september

Diamars ultimo, no solamente tabata un dia special pa partido MEP n’e momento cu e Acuerdo di Formacion a wordo firma p’asina cuminsa cu e fase di Programa di Gobernacion, sino tambe tabata un dia sumamente importante pa MEP ora cu e checkers a wordo gradici pa e trabou elocuente cu nan a haci durante eleccion dia 22 di september.

 

Presidente di Partido, dr. Gerrit Croes a duna un discurso cortico y a gradici tur esnan presente. El a duna un splicacion di kico a bay bon y malo y kico por mehora p’e proximo eleccion.

Sr. Gerrit Croes tambe a haci un apelacion pa tur presente keda den contacto cu partido y yuda den directivanan di bario unda nan ta pertenece.

 

“E trabou pa controla cada urna den tur districto no ta uno facil, sinembargo e cooperacion cu nos a haya di boso, cu a pone boso mes disponibel ful e dia, tabata enorme.

P’e motibo aki, ami, den nomber di lider di MEP, sra. Evelyn Wever-Croes y Partido MEP, ta yama cada un di boso danki pa boso trabou di controla cada urna durante e eleccion,” dr Croes a bisa.

 

Secretario General di MEP, Xiomara Ruiz-Maduro tambe a hiba palabra y a gradici tur presente p’e forma parti di e cambio cu awe nos a logra.

Como ultimo, tur candidato presente a duna un gradicimento final especialmente na tur esnan cu a yuda nan na nan respectivo urnanan.

E encuentro di checkers a tuma lugar na Piedra Plat Entertainment Center.

Top