Mep a pidi reunion di Parlamento y cu Gobernador relaciona cu retiro di Paul Croes

Lider di MEP Evelyn Wever-Croes, hunto cu Parlamentarionan Xiomara Ruiz-Maduro, Dangui Oduber y Guillfred Besaril diabierna mainta a entrega un peticion pa reunion publico den Parlamento y un peticion pa audiencia cu Gobernador.

 

“Fraccion di MEP a bisa desde diaranson caba, cu lo corecto ta p’e Minister tuma su retiro. Esey ta algo cu mundialmente ta wordo aplica den caso di gobernantenan cu ta wordo investiga pa casonan asina serio di corupcion.

Sinembargo e Minister a scoge pa no hasi esey, y Mike Eman como hefe di e Gabinete tampoco a carga su responsabilidad.

Pues awor ta keda na Parlamento pa asumi e responsabilidad ey.

 

Segun nos Constitucion ta Parlamento ta nombra un Minister y Parlamento por retira un Minister. Mirando cu e gobernantenan mes no conoce norma y etica, ta keda na Parlamento pa demostra esey.

Pesey nos a pidi un reunion urgente cu Ministernan Mike Eman, Paul Croes y Arthur Dowers.

 

Locual nos ta haciendo ta vocifera e preocupacion cu ta biba den pueblo. Tanto simpatisante como oponente di partido AVP kier claridad, kico t’e status di e Minister.

Pasobra locual cu nan a splica ta cu e Minister a bay cu un tipo di vacacion, pero un Minister den vacacion ta keda cu tur autoridad segun nos Constitucion.

Ademas, ta iresponsabel pa hisa benta e carteranan di Trabao, Asunto Social y Hubentud, den scochi di Minister Bermudez.

 

Mike Eman a faya como lider di e pais aki. Di dia el a haya sa di e casonan di corupcion, e no a haci nada. El a bisa Paul Croes “bay fix e”.

Sabiendo cu Paul Croes ta un Minister hoben sin experiencia ni conocemento di e peligernan di corupcion den Gobierno.

Enbes cu Mike Eman a duna Paul Croes guia y ayudo pa stop e corupcion, el a lage pa su cuenta. Esey no ta un lider di berdad! Y p’e motibo ey nos a pidi tambe un audiencia cu Gobernador pa expresa nos preocupacionnan.

 

Esaki no tin nada di haber cu e persona di Paul Croes, esaki tin di haber cu e funcion di Minister, y esaki tin di haber cu haci lo corecto.

Si bo ta pretende di ta un Gobierno integro y transparente, bo ta actua como tal, y bo no ta tuma e decisionnan asina iresponsabel.

Mirando cu Gobierno ta actuando na forma iresponsabel, ta keda na Parlamento awor pa carga su responsabilidad.

Awor nos lo bay mira ken den Parlamento realmente ta para pa integridad y honestidad.

 

Nos ta spera di haya e audiencia aki pronto cu Gobernador, y cu e reunion wordo yama inmediatamente” lider di MEP Evelyn Wever-Croes a duna di conoce den entrevista na su salida.

Top