MEP a rindi homenahe n’e damanan cu ta yuda partido MEP

Durante e anochi ameno na Indian Rock Garden partido MEP a celebra Dia Internacional di Hende Muher. Durante e anochi aki lider di partido sra. Evelyn Wever-Croes a homenagea e damanan cu aña aden y aña afo boluntariamente ta traha duro pa partido y pa Forsa Femenino Grace.

 

HISTORIA DI FORSA FEMENINO GRACE

Desde su fundacion, partido MEP tabatin un comision di damas di MEP. Fundador di partido sr. Betico Croes dfm a haya esaki necesario mirando cu ta un partido Social Democrata cu mester brinda sosten na desaroyo di hendenan muher.

Sr. Nelson Oduber y sra. Evelyn Wever-Croes a continua cu esaki, mirando e importancia pa nos partido.

 

Forsa Femenino Grace prome tabata yama Comision di Damas di MEP y esey tabata di tempo di Betico cu semper tabatin e grupo di dama aki, kendenan boluntariamente y cu hopi dedicacion y amor a traha pa partido.

Ta despues cu sra. Grace Bareño a fayece e grupo di damas a haya un nomber fiho, esta Forsa Femenino Grace.

Grace tabata e prome hende muher cu a subi lista di MEP na 1975. Alabez e t’e prome dama na Aruba cu a fungi como Diputado di Aruba. E nomber Forsa Femenino Grace ta na su honor.

 

Sra. Yuyu Croes ta dirigiendo Forsa Femenino Grace y e comision di damas desde su fundacion, y e ta conta cu un equipo di damas sumamente activo.

Nan ta organisa varios actividad pa recauda fondo pa partido, especialmente conoci pa recauda fondo atrabes di koffiemorgen y e celebracion di e fecha importante di awe cada aña.

 

Pesey partido MEP a duna reconocemento na tur e damanan cu durante e 46 añanan desde fundacion di partido, a traha cu alma y cuerpo, y a duna nan cooperacion y aporte na nos partido y pa nos país.

Sra. Evelyn Wever-Croes a rindi homenahe na un total di 30 damas. Por a nota cu cada un a keda sumamente agradecido cu e reconocemento.

Leave a Reply

Top