MEP a start campaña electoral 2017 Hunto p’e cambio! Sin miedo!

Durante un actividad politico enormemente grandi diabierna ultimo partido Movimiento Electoral di Pueblo MEP a lansa su campaña electoral 2017 oficialmente.

Asina MEP ta bira e trend setter, e prome cu a cende e mecha di campaña oficialmente dilanti un publico enormemente grandi, cu a surpasa tur expectativa.

 

Den siman caba a cuminsa cu lansamento di candidatonan nobo, den e caso aki dr. Arthur Vallejo, un candidato cu a causa un impacto grandi. Na prome lugar, como cu Arthur Vallejo ta un dokter hoben, cu ta lansa su mes den politica, asina inspirando hoben profesionalnan, cu or abo kier un cambio den bo pais, bo mester bira parti di e cambio.

Tambe pa su afinidad cu e comunidad latino, pasobra tanto Arthur como su famia ta hopi stima y aprecia den e comunidad latino. Cu lansamento di Arthur Vallejo, partido MEP ta demostra cu hechos cu realmente kier un cambio di rumbo den nos pais.

 

Durante e actividad diabierna na Cede di MEP, a lansa tambe e logo nobo di campaña, y e slogan. E slogan ta HUNTO P’E CAMBIO, SIN MIEDO. Tambe a presente e vision, e pakete di solucionnan cu MEP ta ofrese den e campaña aki. Xiomara Ruiz-Maduro a duna un splicacion elabora rib’e slogan y e logo di MEP, y lider di partido Evelyn Wever-Croes a elabora rib’e vision di MEP.

 

“Tur caminda cu bo bay, hendenan ta bisa cu nan kier un cambio. Riba diferente tereno. Hendenan kier mira un Aruba mas sigur, caminda tin orden y respet bek, manera antes. Hendenan kier mira e helicopter y e radarnan bek den uzo. Hendenan kier mira cu nos ta combati criminalidad cu man duro. Hendenan kier mira tambe cu nos ta haci algo pa baha costo di bida. Nan tambe ta mira cu no tin control riba prijsnan di productonan mas necesario, y kier un cambio. Hendenan kier mira cu prijs di awa y coriente ta baha, mescos cu resto di mundo y kier pa elimina contractnan di hedging cu a pone cu cada hogar a paga double di tarifa compara cu otro paisnan. Hendenan kier mira cu ta mehora nos cuido di salud, y cu nos ta pone un fin na tantisismo persona cu ta muri pa motibo di negligencia medico”, segun Wever-Croes.

 

Awor aki no tin control, y hendenan kier mira un cambio den esey. Nos mester di mas dokter y specialista pa tende cu nos hendenan. Asina tin hopi mas tereno cu nos hendenan kier mira un cambio, pero nos no por hacie nos so. Ta hunto nos mester bai pa e cambio y ta hunto nos lo logra e cambio. Sinembargo, ainda bo ta sinti miedo cerca algun persona. Miedo pa represaya y persecucion politico dor di e Gobierno na mando, si nan expresa nan deseo pa cambio.

P’esey nos ta bisa BAN HUNTO P’E CAMBIO, SIN MIEDO! No mester tin miedo, pasobra represaya ni persecucion politico ta dura largo. Y si realmente bo kier un cambio, e unico forma pa realisa esaki ta pa bira parti di e cambio, sin miedo”, tabata palabranan di lider di MEP Evelyn Wever-Croes.

 

E actividad politico aki, ta marca e comienso di campaña politico 2017 na Aruba. MEP ta e prome partido cu ta marca e pasonan aki. Lider di MEP a referi na un dicho na spaño; “El que llega primero, pega dos veces”, y cu esaki campaña electoral a start oficialmente na Aruba.

Mester remarca cu tabatin un multitud enorme presente, cu a kibra tur expectativa, y especialmente e forma caluroso cu nan a ricibi nan lider Evelyn Wever-Croes, realmente ta muestra cu e campaña electoral aki lo brinda e cambio tan desea. Pabien MEP.

Leave a Reply

Top