MEP: “Be the Change, San Nicolas’ tabata un exito rotundo

Mas e dia yega cerca, mas animo Aruba tin pa demostra cu mester bin un cambio. Y esaki ta wordo demostra na nos partido tur dia sea ora nos bishita hende cas pa cas, ora nos ta para banda di caminda cu actividadnan di plak sticker, nos anochinan informativo como tambe na nos actividadnan den barionan di Aruba.

Diadomingo ultimo, San Nicolas tabata cas pa nos actividad pa gradici e pueblo di San Nicolas pa nan sosten na nos partido den eleccion 2017 y alabes pa presenta nos vision p’e proximo gobernacion.

 

Candidatonan di MEP a sali bay San Nicolas hunto cu nan campañadornan. No a dura mucho pa un caravana bastante largo forma dor di simpatisantenan di MEP cu a uni hunto cu e candidatonan p’asina bay riba.

E actividad “Be the Change, San Nicolas” tabata un exito rotundo. Un asistencia masal tabatin na cede di candidato Chris Romero.

Ambiente tabata tremendo cu animacion di e bandanan local: Tsunami, Claudius Phillips & Oreo y Bito & su Steelpan. MEP ta admira y sostene nos bandanan local y kier gradici tur banda cu a entrene nos publico desde inicio di nos campaña.

 

E anochi aki a bira mas special y hopi emotivo, ora cu lider di MEP, sra. Evelyn Wever-Croes a yama sr. Eddie Briesen riba stage pa ricibi un homenahe di MEP den nomber di e pueblo di San Nicolas y Aruba, p’e bon trabou cu el a desplega como mandatario di nos pais.

Sr. Eddie Briesen tabata Parlamentario di nos pais y tambe a fungi como Minister di Asunto Economico y di Turismo na unda no solamente el a redobla e cantidad di kamber sino tambe e cantidad di turismo di calidad trahando hopi eficiente cu su presupuesto.

 

Esaki alabes tabata clausura di sr. Briesen su carera politico despues di 34 aña. Sinembargo, MEP lo sigui conta cu conseho, sosten y experticio di Edison Briesen y MEP ta gradici sr. Eddie Briesen pa tur locual el a haci pa nos pais.

E anochi exitoso a clausura cu sorteo di rifa cu placa cash na unda MEP tin tres ganador. Esaki a tuma lugar riba stage mes den presencia di e publico presente y e banda Oreo den background.

 

Den e ultimo dianan cu falta pa eleccion, MEP ta sigui cana den pueblo hibando su mensahe di speransa. MEP t’e unico solucion pa trece cambio pa mihor pa nos pais. Dia 22 di september, duna nos bo voto di confiansa y hunto nos lo logra e cambio cu nos tur merece.

Leave a Reply

Top