MEP no a entrega cuenta anual di ‘fraktiemedewerker’ corda di nan partido

“Aruba merece gobernantenan cu ta bisa loke nan ta haci, y ta haci loke nan ta bisa,” ta un declaracion cu Evelyn Wever Croes, lider di MEP a haci dialuna ultimo, pero cu ta liña recta contra di e actuacion di su fraccion den Parlamento.

Ya ta conoce den pueblo, cu fraccion di MEP no ta traha, pero ta presenta ora di reunionnan publico pa haci uzo di cu e reunionnan publico aki a wordo transmiti, pa trata di haci campaña politico.

 

Marlon Sneek lider di fraccion di AVP ta mustra cu ora un lider politico ta bisa algo, e mester ta ehempel di e contenido di su declaracion cu e ta haci y Evelyn Wever Croes nunca a cumpli cu su dicho di ‘bisa loke e ta haci y haci loke e ta bisa’ ya cu na cantidad di ocasion el a mustra cu e no sa kico su declaracion ta nifica.

Sr. Marlon Sneek a sigui mustra cu entre otro e lider di MEP ta papia di bukinan di MEP, cu ta habri pa pueblo bin mira tanto prome y despues di eleccion, sinembargo ora cu bay tuma nota cu  fraccion di MEP no ta cumpli ni cu su obligacion como fraccion den Parlamento, ta keda confirma cu e lider di MEP no ta sincero cu pueblo.

 

Na mes momento Evelyn a trata un biaha mas di humiya un ex miembro di e partido mustrando cu despues di ladronisia den e partido, tur cos ta na ordo awor, pero ta lubida cu fraccion di MEP nunca a cumpli cu su deber y obligacion pa traha un cuenta anual pa loke ta funcionamento di e ‘fraktiemedewerker’ di e fraccion geel den Parlamento.

Ta mesun cos a sosode cu Gobiernonan di MEP den pasado cu nunca por a entrega un cuenta anual manera ley di comptabilidad ta rekeri, pero ta Gobierno di AVP a bin traha duro y pone tur e cuentanan aki bek na ordo.

 

Ora Evelyn kier papia di ‘bisa loke nan ta haci’, Parlamentario Marlon Sneek ta mustra aki cu e lider di MEP t’esun prome cu a faya cu e dicho aki, sigur ora cu publicacionnan den medionan di comunicacion riba su participacion den un serie di transaccion di placa riba e cuenta di Irius Crius dos aña pasa, nunca a bin dilanti y “bisa pueblo loke Evelyn ta haci’ den e caso aki.

Nunca el a papia di dje, nunca el a bin dilanti y  distancia su mes di e maniobranan cu medionan di comunicacion a mustra di ta cosnan straño, pero awor ta pretende cu integridad ta “hoog” den su vision.

 

Marlon Sneek ta spera cu na momento cu e lider di MEP tin cu demostra cu integridad ta algo serio pa su persona, e bin splica pueblo cantidad di desaroyonan den pasado caminda su famia tabata envolvi, cobrando placa di pueblo sin cu pueblo a beneficia di esakinan.

Top