MEP no ta acepta 4 Minister, POR 2 y RED 1, pa cual mester basha awa den biña

For di despues di a haya su encargo pa bira Formador, Evelyna Wever Croes a palabra cu Gobernador cu lo mantene informa di e desaroyo di e negociacion. Esaki lo bira un bes pa siman, si ta necesario.

Di acuerdo cu sra. Evelyna Wever Croes, awor e negociacionnan ta birando mas intensivo, ora cu ta discutiendo loke mester bay bira e programa di gobernacion, cu nan ta spera di lo finalisa den e fin di siman aki.

A duna Gobernador ayera copia di e Acuerdo di Formacion y manera menciona awor nan ta den fase di programa di gobernacion. Si esaki keda cla, probablemente awe ainda lo firma e acuerdo aki.

E proceso no ta bay di e liher ey, pero no tin pura tampoco, segun Formador.

Tin 3 programa di e partidonan banda di otro, y esakinan ta ser compara, kico por acorda y kico no. Hecho ta cu tin diferencia den e diferente programanan.

Ta bon pa awor atende cu tur e puntonan di e programa prome cu yega na cualkier Gobierno. Mihor clarifica tur problema cu por tin, prome cu bay den un Gobierno, unda e diferencianan por escala.

Unabes cla, lo bay over na reparticion di e carteranan ministerial y e apuntacion di kende lo cubri cual cartera. Pa despues e candidatonan pasa e screening, prome cu e Ministernan huramenta.

E ambiente ta bon, pero e no ta facil, segun Evelyna Wever Croes. Imposibel e no ta, pero pueblo kier esaki, esta un Gobierno
di coalicion.

Dia 27 awor, Aruba lo tin un Parlamento nobo, y tur esfuerzo ta ser haci p’e dia ey tambe Aruba tin un Gobierno nobo, pero e ta un proceso serio, no ansha, no pura y lo tin cu tuma su tempo pa duna Aruba su mihor Gobierno.

PUNTONAN DI INTERES
Tin 3 punto importante, cu ta un Gobierno, Bon Gobernacion y Integridad; Finanza Publico y Ser Humano ta Central. E ultimo aki ta ensera hopi mas punto.

E partidonan cu ta formando e proximo coalicion for di un principio a palabra cu cada uno mester di otro basa riba mutuo entendimento.

Pesey vision di cada partido mester ta refleha den e programa, y cada Minister mester por ehecuta tal vision, maske cu e no ta di su partido.

No ta permiti pa cada Minister ta un isla den un otro isla, pasobra e sistema ey sigur e no ta bay funciona.

MINISTERNAN
Un biaha mas Evelyna Wever Croes a ripiti cu mester benta awa den biña y riba un pregunta directo, cu por tin desviacion pa loke ta bira e cantidad di Minister, e Formador a admiti cu esey por t’e caso.

E mes como lider di
MEP no por bende e reparticion cu p.e. MEP ta haya 4 Minister, partido POR 2 y RED 1.

Siendo MEP e partido mas grandi den e coalicion aki, e mester ta refleha den e cantidad di Minister tambe.
No a yega ey ainda, pero banda di Minister, tin algun posicion cu tambe ta importante pa cubri.

Loke tambe ta na discusion di cuanto consehero, cada staff di cada Minister mester ta.

Formador ta kere cu mester traha palabracion adelanta riba esaki, pa despues esaki no sali for di man.

Tur cos ta depende cuanto cartera un Minister tin pa cubri, etc. Nan a haya un presentacion di DRH, cuanto hende por haya.

Top