MEP ta felicita e pueblo di Aruba cu celebracion di Dia di Himno y Bandera

Ta bon conoci pa un y tur cu durante e decadanan 50 y 60 tabata existi un division nunca visto na Aruba y cual division tabata wordo fomenta grandemente pa e partidonan politico di e temponan ey. Sinembargo tabata reina tambe e deseo ferviente bao di nos ciudadanonan pa obtene un status separa den Reino Hulandes. E pregunta ta e ora ey, con por logra e libertad aki teniendo na cuenta cu e pueblo Arubano tabata dividi y e politica di segregacion tabata domina den tur skina di Aruba? Betico Croes, den cuadro di su strategia pa concretisa e deseo di nos pueblo, tabata di firme conviccion cu na prome lugar mester uni nos hendenan pa por logra e libertad aki.

Y Betico a mira den introduccion di un Himno y un Bandera instrumentonan clave pa logra e union den e pueblo Arubano.

 

Introduccion di nos Himno

Asina pues un Comision di Himno a ser institui dia 21 di januari 1976 cu a haya e tarea pa conseha Gobierno si mester haci “Aruba Dushi Tera” himno nacional y si esaki ta afirmativo, ki sorto di ritmo – sea marcha of wals – tin cu wordo uza.

E comision tabata consisti di e siguiente miembronan: Maybelline Arends-Croes, Rufo Odor, Juan Chabaya (Padu) Lampe, E. Bennett, Hubert (Lio) Booi, Rufo Wever y secretario Juan E. Wever. E comision den forma unanime a vota na fabor di interpretacion di e Himno den e ritmo di wals. E comision a duna su recomendacionnan na Gobierno Insular y dia 16 di maart 1976 Eilandsraad di Aruba a aproba ‘Aruba Dushi Tera’ como Himno oficial di Aruba.

 

Introduccion di nos Bandera

Riba e mesun fecha di 21 di januari 1976 Gobierno Insular a instala tambe un Comision di Bandera cu e tarea pa organisa un concurso den pueblo pa un diseño di un bandera di Aruba.

E comision tabata consisti di e siguiente miembronan: Julio Maduro, Wouter van Romondt, Ronald Donk y como secretario Juan E. Wever. Mescos cu tabata e caso cu e Himno di Aruba, riba dia 16 di maart 1976 Eilandsraad a aproba e diseño di e bandera oficial di Aruba.

Dos dia despues, esta 18 di maart 1976, e acto oficial organisa pa Gobierno Insular a tuma lugar den Wilhelminastadion, caminda a proclama oficialmente nos Himno y Bandera y esaki den presencia di miles di nos ciudadanonan cu a acudi pa demostra nan amor patrio y nan alegria cu Aruba tin awor tambe su propio Himno y Bandera.

 

Pakico un himno y bandera?

Den un pais, unda ta reina e deseo ferviente pa sali for di e constelacion Antiyano y pa bira un pais autonomo, bo mester promove e simbolonan di union y libertad, unda cu cantando bo Himno bo ta expresa bo amor pa bo pais y hisando bo bandera bo ta inculca nacionalismo bao di bo pueblo. No mester lubida tambe cu despues di e introduccion di nos Himno y Bandera hopi otro evenemento y accion historico a tuma lugar, e. o. e Referendum di 25 maart 1977 y Augustus Scur 1977 y tur esaki den cuadro di e lucha di nos pueblo pa logra su libertad.

 

Y a dura apenas 7 aña despues di introduccion di nos Himno y Bandera cu ya nos pais a logra su Status Aparte durante e Conferencia di Mesa Rondo na maart 1983. Status Aparte a trece cu ne cu awe nos pais tin su propio Parlamento, Gobierno, institutonan, propio Banco Central, moneda etc. Hecho ta cu tur e desaroyonan positivo riba tereno economico durante e ultimo 31 añanan ta danki na e instrumentonan economico cu pais Aruba haya den su man na momento cu Status Aparte a bin vigor dia 1 di januari 1986.

Ta p’esey pueblo, ban celebra den grandi nos Dia Nacional diasabra awor. Hisa bo bandera cu orguyo y cana cu bo cara na laira, pasobra awe nos ta un pais liber den Reino Hulandes.

Pabien pueblo Arubano cu boso gran dia!

Top